Ceos despexados e temperaturas en ascenso marcarán o final de maio nas Rías Baixas
Por Redacción
Chega a estabilidade atmosférica ás Rías Baixas a finais do mes de maio, segundo indica o servizo de Meteogalicia.
Este luns 27, Galicia permanece na influencia das altas presións. Os ceos continuarán pouco nubrados ou despexados, con intervalos de nubes altas que non impedirán o paso do sol. As temperaturas mínimas situaranse nos 8 graos mentres que as máximas chegarán aos 24 na provincia de Pontevedra, experimentando un ascenso. Os ventos soprarán de compoñente norte frouxos, con intervalos de moderado nas Rías Baixas.
Durante o martes 28 está prevista unha xornada de ceos pouco nubrados ou despexados. As temperaturas situaranse entre 8 e 25 graos, con vento frouxo de compoñente norte, que volverá presentar intervalos de moderado nas Rías Baixas.
O mércores espérase a entrada polo norte de Galicia dunha fronte pouca activa, que terá escasa repercusión no sur da comunidade, que se mantén baixo a influencia das altas presións. As temperaturas mínimas ascenderán lixeiramente chegando aos 10 graos mentres que as máximas alcanzarán os 26 graos. O vento soprará frouxo de compoñente oeste en xeral, moderado de compoñente norte nas Rías Baixas.
A chegada do mes de xuño manterase coas mesmas condicións. Está previsto que predominen os ventos de compoñente norte ao final da semana con temperaturas que se moverán entre os 11 e os 24 graos.