A nova glorieta da Avenida de Ourense permitirá eliminar os semáforos
Por Oskar Viéitez
O Concello de Marín informou este venres que as obras na Avenida de Ourense, proxectadas e impulsadas polo Ministerio de Transportes, "avanzan a moi bo ritmo" e xa é posible ir vendo o resultado do ancheamento da beirarrúa en toda a zona de Cantodarea. Os traballos estanse levando adiante pola UTE de Construcciones Fechi e Moncosa OHS, cun orzamento de 1.250.000 euros.
O ancheamento da beirarrúa pegada aos edificios permitirá resolver problemas de accesibilidade e incluso fomentar a economía local, coa posibilidade de que os locais de hostalaría instalen terrazas. Isto é posible grazas ao desprazamento do eixo central da calzada, para reordenar os espazos.
Pero, ademais diso, a obra suporá un cambio radical na xestión dos fluxos de tráfico. A creación da glorieta á altura do cruce coa Rúa Vidal Pazos permitirá eliminar o semáforo da Rúa Carballiño, e tamén eliminaranse os semáforos da propia Avenida e poderase utilizar a glorieta tanto para continuar, como para incorporarse a Vidal Pazos ou para dar un cambio de sentido, que ata agora só era posible facer na glorieta de Praza de España, sen desviarse
Neste tramo será no único no que se vexa afectado o estacionamento, onde se eliminarán algunhas prazas para poder conseguir a anchura precisa para a construción da glorieta.
O seguinte tramo será o que discorre desde a confluencia coa Rúa Areíña, á altura da Biblioteca, e ata o parque infantil da Alameda. Seguirase ampliando a beirarrúa, respectando neste caso a pedra característica diante do Consistorio, xa que se trata dunha continuación da pedra do propio edificio.
A última parte discorrerá paralelo ao parque infantil e á Alameda, ata chegar a Praza de España. Neste caso, manterase a beirarrúa existente, que xa ten unha anchura de 1.80 metros, sobre todo porque o tránsito habitual de peóns faise polo interior da propia Alameda.
BEIRARRÚA EN GAGO DE MENDOZA
O concelleiro de Medio Rural, Pablo Novas, tamén informou este venres do remate das obras de reparación da canalización de alumeado público e construcción de beirarrúa de Gago de Mendoza, na baixada á praia de Aguete.
Tal e como explicou Novas, “con esta intervención melloramos a mobilidade peonil cara a praia de Aguete, rematando esta beirarrúa que une a esquina do vial de praias do porto”. Ademais, o problema das avarías constantes nesta zona na iluminación debíanse aos roedores, polo que xa se aproveitou a actuación para subsanar esa problemática. A obra ascendeu a un importe de 9.147,60 euros.
Relacionadas:
-
As obras da avenida de Ourense continuarán polo tramo entre a Rúa da Estrada e a Praza de España
Por Oskar Viéitez |
-
Cara finais de ano retiraranse as máquinas da Avenida de Ourense e será traspasada ao Concello de Marín
Por Oskar Viéitez |
-
Mantéñense as prazas para aparcar en toda a beirarrúa anexa aos edificios da Avenida de Ourense
Por Oskar Viéitez |
-
Unha App permite consultar en tempo real a ocupación dos aparcadoiros públicos de Marín
Por Oskar Viéitez |
-
A humanización da Avenida de Ourense dá os seus primeiros pasos na zona de Cantodarea
Por Oskar Viéitez |