Máis de 1.000 cabichas son retiradas cada día das rúas de Soutomaior
Por Redacción
Os servizos de limpeza de Soutomaior están atafegados resolvendo un problema de comportamento cívico. Aseguran que cada día recollen das rúas do municipio máis de 1.000 cabichas que os fumadores non depositan nos recipientes axeitados.
Desde o goberno municipal insisten que, ademais do problema de limpeza e imaxe, tamén se trata dun problema ambiental xa que cando chove moitas desas cabichas acaban na rede de sumidoiros de pluviais, o que fai que vaian directamente á ría de Vigo.
O alcalde de Soutomaior, Manu Lourenzo, lembrou que o Concello está a traballar nunha ordenanza para controlar este tipo de actos incívicos que orixina a "inmensa minoría" da poboación, pero considera que é preciso concienciar e pedir a colaboración da veciñanza.
Alertou de que os lugares onde máis se detectan as cabichas son nas inmediacións de espazos públicos e dalgún establecemento hostaleiro.