Un día para reafirmar o compromiso coa lingua e cultura galegas
Por Redacción
A capital da provincial celebrou este venres 17 de maio a 'Festa da Lingua', organizada polo Centro Social A Pedreira, en colaboración co Concello.
Ao longo da xornada houbo distintas propostas musicais e de animación, que incluiíon un pasarrúas dunha banda de gaitas e as actuacións de Os Vacalouras e Catuxa Salom.
E o Conservatorio profesional de Música Manuel Quiroga de Pontevedra pechou a semana de actividades en torno ás Letras Galegas cun concerto do pianista Alberto Vilas no que presentou o seu último disco "Once cancións e unha danza" sobre temas tradicionais galegos que el mesmo arranxou para piano. O concerto tamén contou coa voz da soprano Cristina Suárez para ponerlle letra a un par de pezas.
POIO
No Concello de Poio o acto do 17 de maio desenvolveuse no Centro Cultural Xaime Illa, coa entrega dos premios da XXXII edición do Concurso Literario que leva o mesmo nome, impulsado pola SCD Raxó.
Contou coa participación de Ramón Rozas, xornalista e crítico literario, que conversou sobre a figura de Luisa Villalta, homenaxeada este ano polas Letras Galegas, e de Xaime Illa.
A programación continúa o sábado con dúas propostas teatrais para público familiar e adulto no centro cultural de Raxó.
MARÍN
O Día das Letras Galegas celebrouse en Marín cun acto institucional no que se fixo entrega do XXII Premio de Poesía no que participaron os centros educativos da vila e tamén a primeira edición do Festival Raíces, Versos e Sons, que promoveron as asociacións Almuinha, Mocidade Polo Cambio e Céltica.
O festival comezou na Praza da Veiguiña cunha exposición de pintura e un recital poético, un tributo á rica tradición literaria da nosa terra. Este evento achegou tamén a creatividade da artesanía galega e a actuación de Zeltia IreVire e Frojan.
SANXENXO
En Sanxenxo, o Concello e o Círculo Cultural Deportivo entregaron os premios do Certame Escolar Os Picariños – Mestre Hermida, nun acto celebrado na Sala Nauta de Sanxenxo.
De temática libre, escritas en galego e sendo obras inéditas e orixinais, os temas máis destacados nesta edición foron o mar, a paisaxe, o misterio ou a intriga, sen esquecerse da violencia de xénero, nun alarde da infinita e audaz imaxinación dos máis pequenos.
Relacionadas:
-
Un curso para aprender a pedalear, unha das propostas lúdico-culturais do Centro Social A Pedreira para xuño
Por Anxo Lourido |
-
Migallas Teatro convida a reflexionar sobre o presente e o futuro da lingua con 'Falemos como galegas'
Por Redacción |
-
Xogos populares, animación e música para prorrogar a celebración das Letras Galegas
Por Redacción & Cristina Saiz |
-
Un de cada catro mozos en Galicia di ser incapaz de falar en galego
Por Oskar Viéitez |
-
Invitación a usar o galego como vehículo de unión
Por Mónica Patxot & Anxo Lourido |
-
Recital 'A outra Patria' na UNED para conmemorar o Día das Letras Galegas
Por Redacción |