"Circo, festa e propaganda", así describe o PSOE o ano de goberno de Ángel Moldes en Poio
Por Redacción
Os catro concelleiros do grupo municipal do PSdeG-PSOE en Poio facían público este xoves o seu balance sobre o primeiro ano de mandato do Partido Popular á fronte do goberno municipal de Poio.
Consideran que este período se resume como "un gran engano" e sinalan que o alcalde Ángel Moldes só ofreceu "circo, festa e propaganda".
Denuncian que o rexedor se estableceu o soldo máis alto da historia do Concello de Poio con 41.000 euros anuais; aumentou o número de asesores, incrementou a débeda e reduciu a capacidade de xestión da administración local, segundo afirmaron os concelleiros socialistas.
Gregorio Agís, portavoz da agrupación, entende que o goberno de Poio exerce unha "fraude" para a cidadanía do municipio. "Ademais de non facer realidade ningunha das actuacións anunciadas, mentiron á cidadanía facendo xusto o contrario do que pregoaban na oposición", sinalaba Agís referíndose á auditoría que anunciara Moldes e que non se acometeu.
O representante do grupo maioritario na oposición afirmou que "o señor Moldes é incapaz de cumprir coas súas promesas" e que "carece por completo dunha folla de ruta para gobernar".
Aseguran que nestes doce meses aumentou a débeda do Concello en 1,5 millóns de euros, debido a dous créditos solicitados de 800.000 e 700.000 euros, malia que "Moldes aseguraba que nunca o faría. Unha mentira máis no seu haber".
Agís asevera que con Ángel Moldes na Alcaldía, o Concello de Poio "vai claramente a peor", explicando que se están perdendo subvencións e fondos europeos.
"O que máis comentan os veciños e veciñas de Poio, incluídos votantes do PP, é que a xestión de Ángel Moldes está a resultar decepcionante", concluíu Agís, que estaba acompañado por Silvia Díaz, Julio Casás e Arsenio Pedre.