Combarro viaxa ao seu pasado medieval para celebrar a xesta do seu veciño Colón
Por Cristina Saiz
Combarro celebra este sábado a festa coa que conmemoran ao seu veciño máis ilustre, Cristóbal Colón. Porque se de algo están convencidos no municipio é da orixe galega do conquistador, ao que diversas teorías sitúan como natural de Poio como destacou un dos seus defensores, o pregoeiro Ramón Pedras 'Petete'..
Así, esta décima edición do Día de Colón volveu a ser un dos festexos máis animados do calendario estival en Poio. A Praza da Chousa está a ser o epicentro dunha ampla programación de actividades para todos os públicos que, por un día, devolven a Combarro á Idade Media.
Centos de persoas, moitas delas vestidas como auténticos personaxes medievais, están a gozar da asollada e calorosa xornada baixo a que se celebra o Día de Colón.
Tan fotografada foi a chegada o venres da nao Santa María, con Cristóbal Colón e a súa tripulación á Praza da Chousa como o foron durante todo o sábado a forca e os aparellos de tortura da Inquisición.
Ademais do mercado artesanal, que encheu a praza de colorido, desde as once da mañá sucedéronse as actividades organizadas polo Concello, en colaboración coas asociacións Combrus, Vides Novas e Leucoíña.
Ao longo da xornada hai, entre outras, exhibicións de tiro con arco, talleres infantís, música na rúa, bailes medievais ou representacións teatrais.
A festa inclúe unha xusta medieval, para facer as delicias de maiores e pequenos.
Relacionadas:
-
Poio recibe a máis de 13.000 persoas grazas aos eventos celebrados esta fin de semana
Por Redacción |
-
Combarro estrea un novo aparcamento disuasorio gratuíto coincidindo coa celebración do Día de Colón
Por Redacción |
-
Combarro vístese de medieval para celebrar o Día de Colón
Por Redacción |
-
O Día de Colón, a festa que reivindica a orixe poiense do navegante
Por Oskar Viéitez & Mónica Patxot |
-
Petete achega a teoría do Colón galego aos escolares de Poio
Por Oskar Viéitez |