Detido un veciño de Marín sen puntos no carné que adiantou a gran velocidade un camión nunha curva sen visibilidade
Por Natalia Puga
A Garda Civil detivo o pasado mércores un veciño de Marín de 42 anos como presunto autor de tres delitos: atentado aos axentes da autoridade con resultado de lesións graves, contra a seguridade do tráfico por condución temeraria e conducir con perda total de puntos.
O home, con múltiples antecedentes policiais, foi detectado por unha patrulla do destacamento de Tráfico da Garda Civil de Porriño na estrada PO-400 (Salvaterra – Filgueira), á altura de Ponteareas.
Os axentes observaron que un turismo circulaba de forma temeraria causando unha situación de perigo para os demais usuarios da vía. Así, efectuou varios adiantamentos en zona prohibida e a gran velocidade, entre eles a un camión de grandes dimensións nunha curva con visibilidade reducida.
Con esta forma de conducir, obrigou aos demais usuarios da vía para apartarse da súa traxectoria para evitar unha colisión.
Dous gardas de Tráfico en moto seguírono para tratar de identificar o condutor e evitar que continuase circulando, pero el fixo caso omiso aos sinais de alto.
Os gardas seguírono por varias vías e localidades próximas e na EP5104, á altura de Covelo, lograron interceptalo. Nese momento, o condutor realizou unha manobra brusca e súbita de xiro e freada cara á súa esquerda, cortou a traxectoria dunha das motos oficiais e chocou contra ela.
O axente da Garda Civil condutor da motocicleta sufriu diversas lesións de consideración polas que tivo que ser trasladado ao Hospital Álvaro Cunqueiro de Vigo.
Pola súa banda, o condutor abandonou o turismo nun lateral da estrada e fuxiu a pé monte a través.
A Garda Civil puxo en marcha un dispositivo de procura con patrullas de Tráfico de Porriño e Seguridade Cidadá de TUI e lograron localizar e deter ao condutor do vehículo e poñelo ao dispor do Xulgado de Ponteareas.