Ábrese o prazo para solicitar praza nas garderías da Xunta
Por Redacción
A Consellería de Traballo e Benestar abriu este sábado o prazo para solicitar praza nas 146 escolas infantís da Rede Galiña Azul. O Diario Oficial de Galicia publicou o venres os requisitos e procedementos para solicitar as prazas. A resolución cos prazos e o lugar de presentación das instancias poderá consultarse a través da web www.escolasinfantis.net ou no propio centro onde se queira matricular ao neno.
Segundo se sinala no devandito anuncio do DOG, o prazo para a presentación de solicitudes de renovación de praza ou de novo ingreso será dende o 22 de febreiro ata o 21 de marzo inclusive, as listas provisionais de admitidos publicaranse o día 2 de maio e as listas definitivas, o día 27 de maio. O prazo para formalizar a matrícula dos nenos admitidos será dende o 28 de maio ata o 10 de xuño, ambos os dous incluídos. O curso comezará o 4 de setembro.
A oferta total da Xunta para o curso 2014/2015 ascende a 8.750 prazas en 148 escolas infantís. Na cidade de Pontevedra, a rede autonómica conta cun total de seis escolas infantís e 487 prazas. Esa oferta inclúe unha escola, a do edificio administrativo da Xunta en Pontevedra, que terán un procedemento de matrícula independente ao estar as prazas reservadas para os fillos de traballadores da Administración autonómica.
NOVIDADES NO PROCEDEMENTO
A orde que regula o procedemento de adxudicación de prazas nas escolas infantís inclúe algunhas novidades. Así por exemplo, no baremo para nenos que solicitan praza por primeira vez nunha escola a puntuación otorgada a cada pai e nai en situación laboral de ocupación increméntase, pasando de 5 a 6 puntos. ÿ preciso lembrar que xa o ano pasado este baremo incrementouse nun punto.
Tamén no que respecta ao baremo, outorgaránselle, como novidade, 3 puntos aos beneficiarios dunha Renda de Integración Social de Galicia (RISGA) que se atopen no tramo de inserción, co fin de dar cumprimento á Lei de Inclusión Social de Galicia, que entrou en vigor en xaneiro deste ano e co obxectivo fundamental de facilitar a vida laboral e familiar ás persoas perceptoras de RISGA.
Así mesmo, as familias cunha renda pér cápita igual ou inferior aos 7.500 euros anuais beneficiaranse dunha exención total de cota a partir do segundo fillo que acuda á mesma escola infantil.
Destacar tamén que se inclúe o suposto de enfermidade grave para xustificar a necesidade de que un neno asista á escola infantil en periodos en que os centros permanecen pechados. Ata agora a xustificación desa necesidade era unicamente por motivos laborais.
FÿRA DE PRAZO E CHEQUE INFANTIL
Ademais, e ao igual que o ano pasado, as solicitudes presentadas fóra de prazo con xustificación admitiranse ata a data anterior á publicación da relación provisional de admitidos (2 de maio) co fin de concretar e unificar prazos en toda Galicia.
A documentación para optar a cheque infantil presentarase coa solicitude de praza nas escolas, como xa se fixo o ano pasado co propósito de axilizar a tramitación do mesmo.