Vinte millóns de euros para paliar os danos dos temporais na provincia
Por Oskar Viéitez
A Deputación activou, na súa Xunta de Goberno deste venres, un plan de actuacións urxentes para que os concellos poidan facer fronte de inmediato, entre outras actuacións, ao deterioro que as infraestruturas municipais sufriron como consecuencia dos sucesivos temporais. A Administración provincial destinará 20 millóns de euros a dúas liñas de axudas e subvencións aos concellos.
Destes 20 millóns de euros, 15 irán destinados a axudas para a realización de obras prioritarias e co obxectivo de dar resposta á imperiosa necesidade que nestes momentos teñen os municipios de reparar os danos que o mal tempo ocasionou en infraestruturas e servizos básicos.
En canto aos 5 millóns restantes, serán para a contratación de 800 operarios, aos que a Deputación lle cubrirá o custe salarial completo, incluída a Seguridade Social.
Así mesmo, o presidente da Deputación, Rafael Louzán, anunciou a próxima activación dun plan de actuacións no litoral que se concretará nunha xuntanza que coa xefa provincial de Costas do Estado que terá lugar o vindeiro martes.