Renfe pon á venda máis de 39.000 billetes semanais nos servizos de Alta Velocidade Galicia-Madrid
Por Oskar Viéitez
Renfe ampliará a partir do 21 de maio a súa oferta de servizos de Alta Velocidade Galicia-Madrid a máis de 39.000 prazas semanais, coa posta en servizo dos trens S106 os coñecidos AVRIL, siglas de "Alta Velocidad Rueda Independiente Ligero". A chegada destes trens implica unha nova oferta comercial coa estrea do servizo AVE a Vigo, A Coruña, Santiago de Compostela, Pontevedra e Vilagarcía de Arousa. Os billetes póñense á venda este xoves día 18 de abril, acompañados dunha campaña de lanzamento con 33.000 billetes con ´Superprecios´ desde 18 euros.
A chegada dos novos trens Avril supón unha importante mellora en Galicia. Segundo asegurou o Ministerio de Trasportes, suporá: máis prazas ofertadas, mellores tempos de viaxe, máis prestacións e maior confort. A nova oferta para viaxar entre diferentes puntos da comunidade autónoma galega e Madrid ascende a partir do día 21 de maio a máis de 39.000 prazas semanais, un 20,3% máis que a oferta actual.
Renfe porá en servizo un tren AVE por sentido na relación Vigo-Madrid, con tempos aproximados de algo máis de 4 horas no traxecto completo. Así, a saída desde Pontevedra será ás 9:46h e chegará á capital ás 13:34h. En sentido contrario, outro AVE partirá de Madrid ás 19:18h e chegará a Pontevedra ás 23:19h.
Ademais, un servizo AVE circulará de domingo a venres en ambos os sentidos entre A Coruña e Madrid, cun tempo de viaxe próxima ás 3 horas e media. A saída desde A Coruña será ás 19:50h, con chegada a Madrid ás 23:23h mentres que, á inversa, o AVE sairá da capital ás 14:41h e chegará á cidade herculina ás 18:14h.
A mellora nos tempos de viaxe nesta primar fase tradúcese en 16 minutos menos nos traxectos desde Vigo e A Coruña a Madrid, así como en 18 minutos de redución no tempo desde Santiago de Compostela á capital.
A chegada destes novos trens forma parte dunha primeira fase de posta en servizo dos trens Avril, axustada á reorganización dos servizos ferroviarios polas obras de ampliación de capacidade que Adif está a realizar na estación de Madrid Chamartín-Clara Campoamor. A oferta comercial cos Avril irá aumentando progresivamente en futuras fases.
Renfe asegura contar con persoal suficiente para empezar o servizo cos novos trens a partir do 21 de maio, xa que leva formando aos seus maquinistas e persoal de intervención a bordo dos S106 en diferentes residencias desde o pasado mes de xaneiro.
Para celebrar cos clientes a posta en servizo dos Avril, Renfe lanza este xoves 18 de abril, unha campaña de ‘Superprecios’ con billetes económicos desde 18 euros para os novos servizos AVE entre Galicia e Madrid, así como nas súas estacións intermedias.
A promoción de billetes, con compra anticipada de dez días, é válida para viaxar desde o día 21 de maio ata o 21 de xullo, con preto de 33.000 prazas promocionais en total nos novos servizos do corredor galego, que se prestan cos AVE S106.
Relacionadas:
-
VÍDEO.- Así debutaba o tren Avril na estación de Pontevedra antes dunha avaría técnica en Ourense
Por Anxo Lourido |
-
Así son os novos trens Avril, que xa circulan por Pontevedra en fase de probas
Por Alejandro Espiño |
-
Galicia pide "detalles" dos trenes Avril porque o anunciado, segundo Alfonso Rueda, "me gusta o xusto"
Por Alejandro Espiño |
-
O ministro asegura que os trens Avril estarán operativos o 21 de maio e duplicarase a oferta existente
Por Oskar Viéitez |
-
Carme da Silva fala do "Eixo Atlántico" e o presidente do Senado corríxelle para que fale "en castellano"
Por Oskar Viéitez |
-
O PP presenta unha moción para que o Concello de Pontevedra esixa ao Goberno a chegada dos trens Avril
Por Oskar Viéitez |
-
O ministro de Transportes chega a Pontevedra nas probas da alta velocidade acompañado dos Reis Magos
Por Oskar Viéitez |