Avance para executar a senda peonil entre Baión e András en Vilanova de Arousa
Por Redacción
Este martes mantiñan unha entrevista Luis López, presidente da Deputación de Pontevedra, co alcalde de Vilanova de Arousa, Gonzalo Durán no Pazo Provincial. Durante este encontro, López comprometíase a construír a senda peonil entre Baión e András no municipio arousán.
A senda peonil situaríase na marxe da estrada EP-9701. Trátase dunha demanda histórica das persoas residentes nesta contorna.
O proxecto avalíase en preto dun millón de euros e xa está redactado á espera de que Deputación e Concello asinen un convenio para fixar os termos que permitan o inicio das obras.
Crearase un itinerario peonil de 570 metros. Actualmente ese espazo, segundo a Deputación de Pontevedra, presenta problemas de seguridade viaria debido ás dimensións estreitas dos laterais e a ausencia de beirarrúas.
A obra pretende reducir o risco de accidente nun punto situado próximo ao colexio, á gardería, centro de saúde e entre dous núcleos de poboación.
Os traballos contemplan a mellora da entrada peonil desde a estrada á gardería, ampliarase o trazado con nova pavimentación e renovación dos servizos; tamén se creará unha plataforma compartida na parte final da senda e instalaranse redutores de velocidade para os vehículos. O proxecto tamén establece a mellora das paradas de autobús e dos cruces coa estrada autonómica PO-531.
Durante este encontro, ámbolos dirixentes, coa presenza do deputado Javier Tourís, teniente de alcalde en Vilanova, analizaron tamén a situación das estradas de As Sinas e Ousensa.