Acepta dous anos de prisión por abuso sexual a unha menor de idade
Por Mónica Patxot & Anxo Lourido
Un home de 70 anos, veciño de Vilagarcía de Arousa, acusado de varios delitos relacionados con menores de idade, chegaba a un acordo de conformidade co Ministerio Fiscal este martes na sección segunda da Audiencia de Pontevedra.
O acusado aceptaba unha pena de dous anos de prisión por abuso sexual a unha menor de idade durante o mes de abril de 2021.
Ao mesmo tempo, aceptaba o pago de multas por outros tres delitos: coaccións, lesións e exhibicionismo diante de menores de idade. As multas son de doce meses a catro euros, prohibición de aproximacións aos domicilios e lugares que frecuenten as tres menores; comunicación con elas por calquera medio; e liberdade vixiada.
Ao longo da mañá, o acusado foi variando a súa opinión en relación a este acordo, que finalmente terminaba asinando para evitar a celebración do xuízo.
A Fiscalía solicitara inicialmente unha condena de oito anos de prisión como presunto autor de abusos e agresións sexuais nun lugar público.
No escrito acusatorio pedíase un ano de prisión por abuso sexual a unha menor de 13 anos e a outros catro por outro abuso a unha menor de 16. Tamén se demandaba outro ano e medio de prisión por tres delitos de exhibicionismo e 19 meses e 15 días de cárcere por outro de lesións.
A vista oral, que finalmente non chegou a celebrarse ao rexistrarse o acordo este martes, suspendérase en varias ocasións debido á ausencia do acusado, a pesar de ser notificado correctamente.