Moreira cuestiona a Lores por Bildu e este proponlle falar de espionaxes 'yanquis' ou das escisións do PP
Por Alejandro Espiño
Era unha das preguntas máis agardadas do Pleno deste mércores. Non pola súa transcendencia na vida política municipal, senón polos comentarios que xerara previamente. Jacobo Moreira interpelou o alcalde, Miguel Anxo Fernández Lores, sobre a súa opinión ante a alianza do BNG con Bildu e CUP para acudir conxuntamente ás eleccións europeas. E o rexedor tirou de 'retranca' para contestar ao portavoz do PP.
Moreira, que criticou o BNG pola "indesexable postura" de abandonar a coalición europea co PNV e CIU e "abrazar" a partidos radicais como Bildu, preguntou a Fernández Lores se apoia os postulados desta formación política e sobre as consecuencias que dita decisión pode chegar a ter sobre os pontevedreses, "porque de seguir así igual chega a colgar unha pancarta de Bildu no balcón do concello".
Tras ironizar sobre que el ten a culpa tamén do tempo, porque "debe ser unha represalia aos pontevedreses", ou porque nas eleccións europeas haxa circunscripción única e que formacións de ámbito autonómico "teñan que ir en coalición con outras", unións que cualificou como "de mera oportunidade e bastante inestables", Fernández Lores propúxolle ao portavoz do PP falar doutros asuntos "de altas miras".
Neste sentido, Lores bromeou con "deixar de lado cuestión prosaicas" relacionadas co día a día municipal para centrarse en "temas de suma importancia e trascendentes mundialmente". E así propuxo debater sobre o efecto que teñen en Pontevedra a espionaxe "yanqui" a líderes mundiais ou as recentes saídas de Ortega Lara e Vidal Quadras do PP, "ou se aquí chega vostede para dividir o seu partido sen necesidade de escisións de fóra".
PREGUNTAS AO GOBERNO LOCAL
Non foi esta a única interpelación ao alcalde neste Pleno. Jacobo Moreira tamén quixo coñecer os plans do goberno municipal sobre a permanencia de Pontevedra en Sogama. Neste sentido, Fernández Lores afirmou que hai un contrato en vigor "e nós somos de respectar os contratos e os acordos", e que se está negociando coa Deputación a entrada do municipio no Consorcio Provincial que quere impulsar dita institución nesta materia.
Unha das anécdotas da xornada chegou coa interpelación sobre as obras en Santa Clara e Blanco Porto. O alcalde decidiu que contestase Antón Louro, responsable de ambos proxectos, e ante a negativa do PP a que fora o socialista quen dese explicacións, decidiu ausentarse coa escusa de ir ao baño. Louro respondeu á pregunta, xa como alcalde en funcións. En todo caso, ambas actuacións retomaranse en próximas semanas tal e como estaba previsto.
O PP tamén interrogou a BNG e PSdeG-PSOE sobre o deterioramento dunha pasarela peonil en Estribela, cuxo arranxo será priorizado, segundo Demetrio Gómez Junquera, dentro do plan de investimentos que se ultima para este barrio; sobre a construción dun skate-park en Domingos Fontán, pendente dun permiso de Costas, dixo Agustín Fernández; ou sobre a recuperación da vella escola de Marcón.
OUTRAS MOCIONES
Ademais, o Pleno debateu varias mociones que se aprobaron por unanimidade como as presentadas polo BNG para esixir á Xunta a rehabilitación integral da estación de autobuses; ou para apoiar o recoñecemento de Indicación Xeográfica Protexida para os viños producidos en Pontevedra. Tamén unánime foi o apoio á moción do PP para avanzar nun Pacto municipal sobre o emprego no marco do Consello Económico e Social (CES).
Co único apoio do goberno municipal aprobouse unha moción presentada polo PSdeG-PSOE contraria á reordenación sanitaria que obriga a pacientes de Pontevedra a desprazarse a Santiago para seren atendidos en diferentes especialidades. O bipartito tombou para rematar unha moción na que o PP esixía un apoio firme do Concello á construción do novo hospital de Monte Carrasco, ao entender que se debería apostar polo Hospital ÿnico en Montecelo.
Relacionadas:
-
A Moreira non lle chegan as explicacións do alcalde sobre a renovación do contrato de Cespa
Por Oskar Viéitez |
-
BNG e PSdeG-PSOE acordan un novo reparto das exclusivas e o PP ameaza con volver o xulgado
Por Alejandro Espiño |
-
María Biempica rompe a disciplina de voto do PP e rexeita a reforma do aborto de Gallardón
Por Alejandro Espiño |