Da ría á mesa a golpe de click
Por Oskar Viéitez
O grupo de Acción Costeira de la Ría de Pontevedra presentou este luns o portal de internet pescadoartesanal.com cun receitario con peixes e mariscos.
Todas as confrarías de pescadores da Ría de Pontevedra (Bueu, Marín, Lourizán, Pontevedra, Raxó, Portonovo e Sanxenxo) están detrás desta plataforma web para a comercialización conxunta das capturas provenientes da pesca artesanal.
Funciona mediante un sistema de avisos de captura e oportunidades de comercialización de peixe e marisco do día, denominado 'produto local'.
O sistema apóiase nas notificacións de capturas de produto que pescadores e mariscadores realizan dende a súa embarcación a través do teléfono móbil utilizando a plataforma web. Desta forma, as lonxas e os comercializadores coñecen, en tempo real, toda a información das descargas de produto que se van producir nas lonxas de baixura da Ría de Pontevedra.
Segundo se explicou na presentación celebrada no Casal de Ferreirós, o principal obxectivo do proxecto é facilitar aos comercializadores poidan coñecer, antes da poxa, o peixe dispoñible para a venda nas diferentes lonxas e con iso poder facilitar a compra dun tipo de peixe nalgunha das lonxas onde se vaia descargar, mesmo, sen necesidade de arriscarse a visitar unha lonxa sen coñecer o produto co que se vai encontrar.
Pero ademais preténdese mellorar a comercialización a través da unificación das forzas da frota artesanal de baixura da Ría de Pontevedra e da centralización da información das capturas á venda en cada lonxa e, por suposto, promover e dinamizar a pesca artesanal.
Outra das vantaxes deste sistema é que achega aos consumidores unha ferramenta para recibir alertas de dispoñibilidade de 'produto local' a través de SMS ou correo electrónico.
Relacionadas:
-
A nova lonxa de Portonovo está pensada para os turistas
Por Oskar Viéitez |
-
O Grupo de Acción Costeira Ría de Pontevedra presenta unha nova edición do Receitario Gacstroderías
Por Redacción |
-
Os pósitos da ría de Pontevedra estrearán en 2014 a primeira 'lonxa virtual' para a poxa do peixe
Por Oskar Viéitez |