Entra a roubar nunha casa e lévase o retrete e unha columna de hidromasaxe
Por Oskar Viéitez
Creada e actualizada
Creada e actualizada
Axentes da Policía Nacional procederon á identificación e detención dun mozo de 24 anos de idade, veciño de Pontevedra, como presunto autor dun delito de roubo con forza no interior dun domicilio da zona de Valdecorvos.
Segundo informan fontes oficiais da Comisaría Provincial, o suceso tivo lugar o día 16 de febreiro sobre as 18.30 horas, cando se recibiu unha chamada na Central da Comisaría Provincial dun particular que alertaba duns fortes ruídos nunha vivenda próxima á súa que se encontra deshabitada.
Ao lugar dirixiuse inmediatamente unha patrulla policial que á súa chegada observaron ao porta de entrada ao terreo aberta e forzada así como o fecho da porta de acceso á vivenda sen a bomba de aire e pechada, escoitando ruídos procedentes dunha ventá lateral que se encontraba aberta.
Ao dirixirse cara a esa ventá os axentes observaron un individuo que saíra fuxindo do interior da vivenda e estaba colgado do enreixado perimetral do terreo tratando de fuxir.
Os axentes tras darlle o alto policial procederon á súa identificación manifestando de xeito espontáneo que accedera á vivenda para substraer os mobles do baño, comprobando os axentes este extremo ao localizar ao lado da ventá amoreados todos os sanitarios ademais e unha columna de hidromasaxe.
Por todo iso os axentes procederon á súa detención polo roubo con forza. Tras prestar declaración en dependencias policiais pasou a disposición xudicial.
Este luns, a última hora da mañá, recibiuse outra chamada na Comisaría alertando de que estaban a intentar volver levarse varios retretes da mesma casa de Valdecorvos.