Conclúen as obras de reparación urxente da cuberta da escola infantil O Grupo
Por Redacción
A concellería de Educación de Marín informou do fin dos traballos de urxencia levados a cabo na cuberta da Escola de Educación Infantil O Grupo.
Esta reparación acometeuse con présa debido a que se estaban a rexistrar filtracións de auga nas aulas, dificultando o día a día do servizo.
"En canto fomos coñecedores desta situación, encargamos un informe aos técnicos municipais para examinar esa entrada de auga", explica a concelleira Marián Sanmartín.
Segundo reflicte ese informe, o problema de filtracións debíase a un defecto na cuberta do edificio.
A actuación realizada consistiu na substitución da parte da cuberta que se atopaba en mal estado, de preto de 210 metros cadrados. O investimento realizado é de preto de 40.000 euros.