![](/web/cache/scene/uploads/fotos/foto/1d3/_S7QytKoutjK3UsovKMnMzytWsi62MgJyq/Lzc52L8gt0zCwMdI_/_wNDHSSU/NKUot0SvILlKxrAQ==_/65f98a4dcf-img_3403.jpg)
© Concello de Pontevedra
O alcalde presenta a representantes veciñais e comerciais da Parda o proxecto do futuro parque do barrio
![Oskar](/web/cache/scene/uploads/xornalistas/foto/b40/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/573b7bbf54-perfil.jpg)
Por Oskar Viéitez
![](/web/cache/scene/uploads/fotos/foto/402/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/65f98a3389-img_3392.jpg)
© Concello de Pontevedra
O alcalde de Pontevedra, Miguel Anxo Fernández Lores, mantivo este martes unha reunión con representantes da asociación de profesionais e pequenas empresas da Parda, ademais da asociación de veciños do barrio, para presentarlles os proxectos do novo parque e pavillón da cidade. O rexedor estivo acompañado dos concelleiros Xaquín Moreda, Anabel Gulías e Alberto Oubiña.
Fernández Lores afirmou que foi "unha reunión produtiva", na que puido amosar e conversar sobre os futuros proxectos ideados para o barrio, que inclúen a construción dunha gran zona verde, como é o parque da Parda, así como a construción dunha nova zona de estancia sobre as vías do tren na rúa 12 de novembro.
"Quixemos presentarlles este proxecto de vital importancia para a cidade, ademais, claro, de escoitar as súas demandas", indicou Lores.
"Falamos dun proxecto que xa está en tramitación, que recollerá diversas cuestións como a mellora xeral dun barrio cheo de xente nova a través deste parque, e que tamén acollerá no futuro un pavillón de competición deportiva para escala, ximnasia e outras disciplinas cubertas", engadiu o alcalde da capital.
O rexedor asegurou que o futuro parque da Parda "transformará totalmente o aspecto dun espazo de máis de 30.000 metros cadrados", contando tamén con zonas de aparcadoiro próximas aos xulgados. "Temos xa unha partida reservada no orzamento do ano pasado e asinaremos un convenio coa Deputación para que o proxecto vexa a luz", indicou.
Dentro das demandas recollidas, o alcalde destacou a petición dunha posta en valor dos distintos comercios, debullándose a posibilidade de facelo a través dunha guía comercial da zona, achegándolles os establecementos á veciñanza.
"Agradecemos as súas opinións e achegas, así como a súa asistencia a esta xuntanza, que recoñezo que foi produtiva e positiva", finalizou Lores.