El Cafetín e Otoro, entre os participantes do Desafío XChef de Cervezas 1906
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Dous restaurantes da área de Pontevedra participarán na primeira edición que se celebra en Galicia do certame Desafío XChef de Cervezas 1906. Trátase de El Cafetín (Pontevedra) e Otoro (O Grove), que competirán con outros 39 establecementos galegos.
Cada un dos participantes debe idear unha tapa e propoñer unha maridaxe con algunha das cervexas da familia 1906, que comercializa a corporación Hijos de Rivera.
Ata o próximo 24 de marzo, os clientes poderán avalar cos seus votos as tapas daqueles cociñeiros que máis lles convenzan e só catro deles chegarán á gran final do certame, que se celebrará en abril na Coruña, no marco do Fórum Gastronómico de Galicia.
Desafío XChef de Cervexas 1906 é un certame que percorre todo o país co obxectivo de recoñecer o esforzo dos cociñeiros por introducir boas prácticas nos procesos que levan a cabo nos seus establecementos.
Deste xeito, a través desta competición, a organización reta aos aspirantes para demostrar, non só a súa destreza e creatividade á hora de presentar unha receita, senón o transfondo comprometido que está detrás da súa elaboración.
O gañador obterá un premio en metálico de 1.000 euros e o segundo clasificado de 500 euros, mentres que o terceiro e cuarto clasificado recibirán o seu peso en cervexa.