O PXOM do Grove, a un paso da súa aprobación plenaria
Por Redacción
A Xunta de Galicia remitiu ao concello do Grove un informe previo á aprobación inicial do Plan Xeral de Ordenación Municipal (PXOM) e o de adecuación ao plan de ordenación do litoral, o paso previo para que en breve prazo de tempo se poida proceder á súa votación no Pleno municipal.
Nos próximos días a Xunta de Galicia e o Concello manterán un novo encontro para concretar algunhas das cuestións que deben ser emendadas antes de proceder ao debate plenario. Este venres, a secretaria xeral de Ordenación de Territorio e Urbanismo, Encarnación Rivas, trasladou ao goberno local do Grove o informe previo á aprobación inicial (IAPI) do PXOM que o concello grovense presentara o pasado mes de xaneiro.
Na actualidade, O Grove conta con 11.241 habitantes e 7.791 vivendas e o documento considera un crecemento demográfico ata 2025 de 1.800 novas vivendas. Dende a Xunta solicítase, neste sentido, a necesidade de xustificar estas previsións e corrixir algúns erros de carácter documental e formal. Ademais, recoméndase axustar a clasificación dos sectores do chan, xa que non se respecta os núcleos rurais e se ocupan espazos que deben ser obxecto de especial protección polas súas características naturais.
Por outra parte, a Xunta fai referencia á adecuación do documento ao Plan de Ordenación do Litoral (POL) e sinala que O Grove está incluído nas áreas de protección intermareal, costeira e mellora ambiental e paisaxística do POL. E neste sentido, apunta que a gran maioría dos ámbitos de chan urbano non consolidados poden entenderse como complemento de latrama urbana existente.
Unha vez que se realicen os axustes que se solicitan, o concello poderá proceder á aprobación inicial do PXOM no pleno ao mesmo tempo que se expoñerá ao público durante dous meses para a presentación de alegacións. Tras a aprobación plenaria, o concello terá que trasladar o documento á Xunta de novo para a aprobación definitiva por parte da administración autonómica que achega 260.000 euros.
Na actualidade, o concello do Grove encóntrase regulado por unha Ordenación Urbanística provisional vixente dende 2002.