As obras de remodelación de Concepción Arenal e da Rúa da Ponte arrancarán esta semana
Por Oskar Viéitez
Esta semana comezarán as obras en dúas das rúas máis céntricas do casco urbano de Marín.
O tramo sen humanizar de Concepción Arenal e a Rúa da Ponte cambiará a súa fisionomía para pasear por elas e desfrutalas facendo un uso compartido do espazo urbano máis xusto entre o coche e o tránsito peonil.
Este proxecto forma parte dunha estratexia de mobilidade sostible máis ambiciosa auspiciada pola Xunta de Galicia, administración que financia os traballos, para fomentar entre Pontevedra e Marín un eixo común no que se favorezan os desprazamentos a pé e en bici.
En total, actuarase en cerca de 2,5 quilómetros de lonxitude, comenzando este luns polo tramo de Concepción Arenal, onde se entroncará coa parte que xa se humanizou no seu día, aplicando solucións similares:
Segundo explicou a alcaldesa de Marín, María Ramallo, "haberá unha redistribución dos espazos, para dotar de máis amplitude ás beirarrúas, reordenando o espazo de estacionamento, as zonas de carga e descarga e, por suposto, atendendo ao cen por cen ás esixencias de accesibilidade universal".
Así, co novo deseño e cando a execución dos traballos remate, contará cunhas beirarrúas máis amplas, nas que se reforzarán puntos de luz (especialmente nos pasos de peóns) e colocaranse novas xardiñeiras, bancos e papeleiras; e un pavimento renovado para o tráfico rodado. Os colectores manteranse no lado dereito ao longo de todo este tramo para facilitar a carga lateral na recollida.
A inversión que se realizará entre este tramo que empeza e o da Rúa da Ponte, que será a seguinte fase, ascende a máis de 920.000 euros.
Relacionadas:
-
A estratexia de mellora do espazo urbano de Marín continúa coas obras en Concepción Arenal
Por Redacción |
-
Adxudicadas as obras da nova senda na PO-546 no treito urbano de Marín por un millón de euros
Por Redacción |
-
Ramallo quere ampliar beirarrúas en Jaime Janer con melloras orzamentadas en 1,2 millóns de euros
Por Redacción |