Unha auditoría encargada en 2011 detectou oito deficiencias graves na Estación de Autobuses
Por Alejandro Espiño
Creada e actualizada
Creada e actualizada
O estado de abandono que sofre a Estación de Autobuses de Pontevedra é "sobradamente coñecido" pola Xunta de Galicia, segundo denunciou este venres o concelleiro Luís Bará. Desvelou que o goberno galego encargou en 2011 unha auditoría sobre o estado deste equipamento, un informe que detectou oito "deficiencias graves" nas instalacións. Desde entón, dixo, malia a "gravísima situación", non se actuou no recinto.
Ese é o motivo polo que o grupo municipal do BNG presentará unha moción, primeiro no Pleno de Pontevedra e posteriormente no Parlamento galego, para esixir á Xunta de Galicia que solucione o "deterioro, abandono e degradación palpable" da Estación de Autobuses. Trátase, insistiu Bará, dun espazo "tétrico, completamente inaccesible e que dá unha mala imaxe da nosa cidade".
As principais carencias das instalacións prodúcense, segundo o goberno municipal, en materia de accesibilidade. O edil nacionalista sinalou que, entre outras cuestións, non funcionan os ascensores nin o montacargas, as escaleiras mecánicas non funcionan e as dársenas dos autobuses están demasiado elevadas. O problema provoca que "cada vez máis xente utilice a rampa de entrada e saída dos vehículos e non entre nin no edificio".
Ademais, Bará denunciou a imaxe, conservación e mantemento das instalacións, especialmente o abandono do inmoble, a deficiente iluminación, os desconchados na parede, o mal estado do mobiliario, a ausencia de negocios ou o deplorable aspecto dos servizos hixiénicos. A todo iso súmase as deficiencias na información ao usuario, tanto en relación ás liñas de transporte existente como aos servizos da estación.
Desde o goberno municipal insisten en que nin a Consellería de Medio Ambiente, Territorio e Infraestruturas nin a concesionaria das instalacións, a empresa Estación de Autobuses SCG, acometeron os traballos necesarios para solucionar estas deficiencias. Bará asegurou que a Xunta de Galicia anunciou en varias ocasións, a última delas hai apenas seis meses, unha serie de investimentos nas instalacións que nunca se chegan a materializar.
Por iso, o BNG apostará por unha "ofensiva política" para que se corrixa esta situación. Unha postura á que espera que se sume o Partido Popular "se de verdade defende os intereses de Pontevedra, en lugar de ser o voceiro e o recadeiro da Xunta".
RESPOSTA DA XUNTA
Preguntados respecto diso por PontevedraViva, a Consellería de Medio Ambiente, Territorio e Infraestruturas asegura que a actuación de mellora da accesibilidade e do estado das instalacións da Estación de Autobuses de Pontevedra xa ten redactado o proxecto e, nestes momentos, está en fase de supervisión. A licitación, avanzan desde o goberno galego, producirase en "próximas semanas".
Relacionadas:
-
As obras de mellora da estación de autobuses estarán rematadas no primeiro trimestre de 2015
Por Redacción |
-
Xa poden comezar as obras de reforma da estación de autobuses
Por Redacción |
-
A Xunta licitará no mes de abril as obras de mellora da estación de autobuses de Pontevedra
Por Oskar Viéitez |
-
Esixen á Xunta que actúe "con urxencia" ante o estado da Estación de Autobuses
Por Redacción |