O Concello de Vigo ficha ao exdirector do Museo de Pontevedra cesado polo PP na Deputación
Por Oskar Viéitez
O Partido Popular criticou as "artimañas" da concelleira socialista do Concello de Vigo, Carmela Silva polo nomeamento provisional como xefe dos museos municipais ao historiador José Manuel Rey, que dirixiu o Museo Provincial de Pontevedra entre 2019 e 2023 e que foi cesado dese cargo polo PP, cando chegou ao goberno da Deputación.
O consistorio vigués dispuxo a provisión temporal dunha praza que leva vacante catro anos, e en tanto non se resolva a convocatoria e provisión definitiva da devandita praza e, en todo caso, por un máximo dun ano, prorrogable por outro máis.
A contratación xustifícase na "inaprazable e urxente necesidade" de cubrir o posto, segundo apuntan os informes da concellería de Patrimonio Histórico, dirixida pola expresidenta da Deputación de Pontevedra, Carmela Silva.
Para esta provisión non se designou ningún tribunal, senón que os candidatos debían presentar a documentación solicitada, cumprimentar unha serie de requisitos e, a concellería interesada, sería a encargada de seleccionar de acordo a "criterios obxectivos e de idoneidade, antigüidade, nivel de coñecemento do posto, experiencia e formación".
Para o Partido Popular, "estas maneiras lembran a aquel informe que se usou para botar ao novo equipo de goberno da Deputación da sede de Vigo, mesmo antes de que tomase posesión", polo que concluíron que Carmela Silva "aínda non superou a perrencha de perder a presidencia da institución provincial".