O Fiscal mantén a petición de 15 anos de prisión para o veciño do Grove acusado de violar a súa filla
Por Anxo Lourido
O Ministerio Fiscal, representado por David de la Fuente, mantén a petición de 15 anos de prisión que se recollía no escrito de acusación contra José Luis S.S., o veciño do Grove que presuntamente violou de xeito continuado á súa filla legal, nacida en 1991, durante un período comprendido entre o ano 2001 ata 2008. A vista oral desenvolveuse na Audiencia Provincial de Pontevedra a porta pechada.
O tribunal da sección cuarta decidiu evitar a presenza de público e de medios de comunicación na sala ao tratarse dun delito contra a honra e, desta forma, protexer a identidade da moza que, segundo a acusación, foi vítima dos abusos do pai legal, que non biolóxico, dende os 10 anos. Segundo se recollía no escrito da acusación, José Luis S.S. "veu exercendo actos atentatorios da liberdade sexual da súa filla legal dun modo continuado no tempo, practicamente a diario" durante sete anos.
O fiscal sinalaba ao termo do xuízo que non variara durante o desenvolvemento da vista nada da súa acusación na que sinalaba que "obrando coa finalidade de satisfacer o seu apetito sexual" e facendo uso da súa superioridade "comezou a levar a cabo dun modo cotián e particularmente humillante para a integridade moral da súa filla" diferentes actividades de tipo sexual nas que empregaba "nalgunhas ocasións a violencia física e noutras a violencia psíquica, a través de ameazas,". Os feitos iniciáronse, segundo o Fiscal, a raiz da separación do matrimonio formado polo acusado e a nai da nena, cando o pai se fixo cargo como proxenitor custodio da menor e dos seus dous irmáns.
NUNCA INGRESOU EN PRISIÿN
Pola súa banda, o avogado encargado da defensa, Juan Carlos Rivas, indicou a PontevedraViva que el solicita a libre absolución do acusado apuntando que José Luis S.S. nunca ingresara en prisión: "él siempre estuvo en libertad, algo que resulta indicativo, ¿no?". A moza non presentou acusación particular na vista oral que durou catro horas e na que declararon diversas testemuñas e peritos, a través de vídeo conferencia.
Ademais da pena de 15 anos de prisión, o Fiscal reclama unha pena accesoria de vinte anos de prohibición de aproximación nun radio de 250 metros respecto á filla e vinte anos de prohibición de comunicación por calquera medio ou método. Tamén se solicita unha pena accesoria de inhabilitación especial para o exercicio da patria potestade do seu fillo menor de idade. E por vía de responsabilidade civil, reclámanse 60.000 euros en concepto de danos morais.