O BNG fala de "apagón de Nadal" no rural en Poio e pide transparencia ao goberno local
Por Redacción
Creada e actualizada
Creada e actualizada
O BNG de Poio denuncia que o actual goberno do PP provocou un "apagón de Nadal" no municipio, ao optar pola eliminación da iluminación no rural e en diferentes puntos da localidade.
Os nacionalistas sinalan que o ano pasado o Concello de Poio repartía 270 adornos luminosos con arcos para as estradas e diferentes lugares do Concello.
No rural había puntos de iluminación durante o Nadal en Vilariño, Chancelas, Sartal, Río Mouro, Estrada de Campelo, Lourido, Raxó, Ucha, San Martiño, Liñares, Samieira, Pereiro, Casalvito, Muiño, Fragamoreira e Aris.
Nas zonas urbanas tamén había iluminación en puntos como rúa Valiña, Portosanto e Boa Vista.
En vista desta iluminación dos anos anteriores, o BNG mantén que "se por algo destacou o Nadal en Poio foi polo respecto a dispersión territorial do noso Concello", pero agora a realidade é diferente, e xa non se entende que o Nadal ten que chegar ás zonas máis rurais.
Ademais, destacan que a anterior Concelleira de Cultura deixou programada a contratación da iluminación deste 2023. No contrato recollíase todos os puntos do rural e diferentes rúas e lugares do Concello. Agora, segundo destaca o BNG, "a falta de transparencia do actual Goberno, fai que teñamos que enterarnos pola prensa da programación de Nadal, omitindo os órganos de consulta de Goberno".
Así, denuncian que hai unha delegada de Cultura que "non comparece nas comisións e tampouco facilita información aos requirimentos e preguntas". Isto provoca que "a día de hoxe temos total descoñecemento de cal é o motivo polo que non se colocou a iluminación nos diferentes puntos do Concello".
O BNG solicita ao Goberno Local que "practiquen a transparencia da que facían bandeira" e informen á oposición da planificación de Nadal.
RESPOSTA DO GOBERNO LOCAL
A concelleira de Cultura e Educación, Natalia Sabarís, lamentou esta crítica do BNG "xusto despois dunha inauguración histórica este sábado, na que se superaron todas as expectativas". "O que lle molesta é que os veciños xa están recoñecendo que é o mellor Nadal que recordan ata o momento en Poio, e isto só está comezando", sinala a edil.
Nesta liña, pide que fagan memoria "do Nadal que organizaban a destempo e, incluso, con tristeza, xa que nalgún ano era 30 de decembro e continuaban colocando arcos de luces, e mesmo daban por amortizadas as festas sen ningún tipo de programación nin contido".
Natalia Sabarís agradeceu a implicación de máis de corenta colectivos e dos escolares na programación e decoración do Nadal nas sete aldeas ubicadas nos lugares máis representativos de todas as parroquias.
Por último, Natalia Sabarís lembra que hai un ano, a información de Nadal non se tratou nunha comisión informativa ata o 16 de decembro, "e foi de pasada".
Relacionadas:
-
Máis de 300 persoas acompañarán a comitiva dos Reis Magos na cabalgata de Poio
Por Redacción |
-
Chegan novos equipamentos tecnolóxicos para reforzar a aula CeMIT de Poio
Por Redacción |
-
Poio métese de cheo nunhas festas do Nadal "de todos e para todos"
Por Redacción |
-
Esta é toda a programación de Nadal do Concello de Poio
Por Oskar Viéitez |
-
Reveladas as cinco gañadoras do concurso de tarxetas de Nadal de Poio
Por Redacción |
-
Escolares de Poio pintan e decoran as Aldeas de Nadal
Por Redacción |