Perfecto Rodríguez recórtase o soldo en 3.000 euros ao ano
Por Oskar Viéitez
O alcalde de Ponte Caldelas, Perfecto Rodríguez, decidiu axustar a súa dedicación exclusiva á táboa salarial aprobada recentemente polo Consello de Ministros e que para concellos entre 5.000 e 10.000 habitantes, se fixa en 45.000 euros brutos anuais.
Dende o gabinete do alcalde recordan que a pesar de que o concello de Ponte Caldelas non estaba obrigado a aplicar esta táboa ata xuño do 2015, "por cumprir os requisitos de estabilidade presupostaria, aforro neto positivo e prazo de pagamento a provedores", o alcalde decidiu aplicalo dende xaneiro deste ano, e así figura xa no novo presuposto e na nómina cobrada xa en xaneiro. A rebaixa supón unha redución de 3.000 euros brutos ao ano.
Hai que ter tamén en conta que a nova Lei da Reforma Local permitiría en Ponte Caldelas que houbese tres dedicacións exclusivas, non obstante se mantén unicamente a do alcalde.
INVESTIMENTO DE 1.158.000 EUROS PARA ESTE ANO
A Comisión Informativa ditaminou favorablemente, coa abstención da oposición, os presupostos do 2014 que serán sometidos a aprobación do pleno da corporación que terá lugar o xoves 6 de febreiro e que ascenden a un total de 3.196.959,92 euros.
Perfecto Rodríguez prevé un investimento de 1.158.000 euros para o presente exercicio no rural do municipio froito das xestións que realizou ante a administración provincial e autonómica que permitirán, a pesar da limitación presupostaria, afrontar obras de saneamento, mellora de parques públicos, viais e eficiencia enerxética na iluminación.