RADIO.- Entramos en campaña... do Festival de Eurovisión
Por Marisa Ciordia
Esta fin de semana toca votar, non para escoller gobernos municipais, senón para determinar que intérprete, en definitiva que país, levará o micrófono de cristal do Festival de Eurovisión. A cita neste 2023 é Liverpool, ante a imposibilidade de celebrarse en Ucraína; e previamente, a cita anual tamén estivo no faladoiro das 'Conversas na Ferrería'.
Un ano máis convidamos a catro expertos na convocatoria eurovisiva, Daniel Seijo (colaborador do Euroté), Luís Miguel Alonso, Paula Suárez e Antón Prieto. Desmenuzan a presente edición desde a celebración e selección, no caso de España do Benidorm Fest, do que saíu a proposta gañadora con Blanca Paloma e o tema 'Eaea'. Tamén nos contan algúns cambios que se decidiron para o sistema de votacións, así como algún que outro que se quixo aplicar, pero que finalmente quedou en suspenso.
Comentan igualmente as propostas que estiman teñen máis posibilidades de gañar e que apuntan este ano a unha repetidora no Festival, Loreen que representa a Suecia con 'Tatoo' e que como ben avanzaron antes da primeira semifinal quedou seleccionada para a final do sábado con países como Finlandia, Israel, Portugal ou Noruega.
Todos coinciden nos dous primeiros países como posibles gañadores de Eurovisión 2023 - que non significa que sexan os seus favoritos -, Suecia e Finlandia. Daniel engade entre eses tres primeiros a España, do mesmo xeito que Antón; mentres que Luís coloca a Francia e Paula a Italia. Podes escoitar o podcast completo na ligazón que se adxunta e descargalo desde a web de PontevedraViva Radio.