O uso do galego como elemento diferenciador e de calidade, obxectivo do BNG na política lingüística
Por Redacción
Os membros da candidatura do BNG, Anabel Gulias, Anxos Riveiro e Demetrio Gómez mantiveron este xoves unha reunión coa Coordinadora de Traballadores pola Normalización Lingüística na que falaron dos retos da lingua dentro do programa dos nacionalistas.
Nun encontro presidido pola cordialidade e receptividade, os representantes da Coordinadora aplaudiron as políticas de promoción e fomento do uso do galego que se están a realizar por parte do Concello de Pontevedra, e prestaron especial atención ás propostas de futuro que recolle o programa electoral do BNG.
“Aproveitar o feito diferencial do uso e coñecemento do galego, como elemento que nos fai singulares, e polo tanto, dá valor engadido aos produtos que empregan a lingua”, é o principal obxectivo para o BNG ao respecto do eido da Normalización Lingüística. En definitiva, potenciar o galego, como elemento de calidade económica.
Ademais, tamén propón “afianzar a aposta pola mocidade, fomentado que usen o galego fora do ámbito doméstico, para chegar a unha inmersión total dos mozos no uso do idioma do país”.
A terceira das apostas do BNG no uso do idioma é o traballo en rede. “Facer do galego lingua de unión e de uso común entre asociacións, entidades e administracións con traballos e proxectos colectivos”, sinalaron.
A meta é empregar o galego como elemento esencial na identidade nacional, “que nos diferenza como país”, para acadar un desenvolvemento dunha sociedade “nitidamente galega”.