Os socialistas de Pontevedra e Marín reivindican a construción dun paseo peonil-bici
Por Redacción
As candidaturas socialistas de Pontevedra e Marín percorreron este domingo a pé a distancia entre o límite dos dous concellos, en Estribela-Cantodarea, e a capital da provincia. Un acto para reclamar a construción do pretendido paseo peonil e carril bici polo interior e sen impactar con novos recheos ou pilotaxes sobre o leito da ría. A marcha partiu ás 11 horas e chegou a Mollavao unha hora despois.
O candidato pontevedrés, Agustín Fernández, e a súa colega marinense, Luz Santiago (Uchi) encabezaron un percorrido que transitou pola beirarrúa da estrada vella. Durante a andaina destacaron o deterioro desta beirarrúa, con moitos puntos estreitos e cruzamentos perigosos.
Durante a ruta, os socialistas comprobaron que "hai espazo suficiente para trazar un paseo ecolóxico e sen impacto ambiental entre a estrada vella e a vía do tren". Sinalaron que "mesmo hai unha oportunidade magnífica de poñer en valor a xunqueira de Ponte Muíños, un paraxe natural absolutamente infravalorado".
Apuntaron ademáis que o proxecto "debe traballar correctamente o paso polo punto negro de Ence-Elnosa e acceder a Os Praceres potenciando o regato que discorre a carón da fábrica".