Marea Pontevedra actuará localmente contra as políticas neoliberais
Por Oskar Viéitez
A eurodeputada de AGE, Lidia Senra, acudiu este venres en apoio da campaña Marea Pontevedra ás eleccións municipais. "Os problemas de Pontevedra e a súa comarca terán voz no Parlamento Europeo grazas a Lidia Senra", sinalou o candidato da Marea, Luis Rei.
O alcaldable recordou que a súa formación política se distingue do resto por asumir unha serie de compromisos no seu programa como a remunicipalización do ciclo da auga ou a aposta polo comercio local que se plasma, por exemplo, no seu posicionamento en contra do polígono comercial proxectado na zona de Xunqueira de Alba.
Luis Rei contrapuxo a "loita labrega" que representa Lidia Senra co "kit de labrego" que por unhas horas vestiu o candidato do PP, Jacobo Moreira "cun legón na man e sachando un palmo de terra", polo que recomendaron "menos fotos e máis feitos".
Pola súa banda Lidia Senra insistiu en que "os concellos van ter un papel moi importante na defensa dos bens comúns", e explicou que a política municipal "non pode ser allea" a cuestións "moi importantes" como as "políticas neoliberais" que dende Europa "entregan o país ás corporacións transnacionais" o que "terá graves consecuencias para a economía e os dereitos dos cidadáns", entre as que citou, a privatización da auga.
Para Luis Rei que "algúns políticos" din que carecen de competencias para actuar en asuntos como o emprego, "non deixan de ser escusas de mal pagador", polo que incidiu na necesidade de reverter algunhas das dinámicas existentes devolvendo á xestión pública servizos como a recollida de lixos, o mantemento dos xardíns, o guindastre, ou o xa citado servizo de auga.