O PP, único partido que declina a invitación do 15M para participar en Pontevedra Pregunta
Por Redacción
O movemento cidadán 15M Pontevedra, con motivo destas eleccións municipais, volve celebrar unha nova edición da iniciativa Pontevedra Pregunta. Trátase dun acto público no que a cidadanía terá a oportunidade de formular directamente as súas preguntas aos candidatos que presentan cada un dos partidos políticos que aspiran a obter representación no Concello de Pontevedra.
Desta volta, serán dúas xornadas: os días 15 e 16 de maio. O primeiro día estarán Compromiso por Galicia, PSdeG-PSOE e Tod@s por Pontevedra. Será ás 19.30 horas no salón de actos da Facultade de Belas Artes. Pola súa banda, o Teatro Principal acollerá ao día seguinte á mesma hora a participación de BNG, Marea Pontevedra e Ciudadanos.
Segundo o 15M, o Partido Popular foi o único que declinou participar neste formato "amosando unha vez máis, a súa desafección co contacto directo e transparente coa cidadanía".
O formato será o mesmo que en xornadas anteriores. En primeiro lugar, realizarase unha pequena presentación de cada un dos partidos políticos (máximo de sete minutos), nos que os candidatos poderán expoñer o seu programa electoral, os seus obxectivos ou todo aquilo que poidan considerar de interese para o debate.
Finalizadas as presentacións, comezará a rolda de preguntas por parte do público asistente, tralo que os candidatos terán un tempo de resposta de noventa segundos. Seguidamente, a persoa que formule a pregunta, poderá matizar ou pedir algunha aclaración relativa á resposta, dando paso á correspondente quenda de réplica para a que o candidato terá outros sesenta segundos.