Moreira presenta os seus "15 motivos para darlle a volta" a Pontevedra
Por Anxo Lourido
O candidato á alcaldía de Pontevedra polo Partido Popular, Jacobo Moreira, presentou nun almorzo informativo durante este luns 4 maio os seus '15 motivos para darlle a volta' á cidade que se estenden tamén ás 15 parroquias pontevedresas.
A principal prioridade do representante popular é a creación de emprego e, neste sentido, Moreira promete levar a cabo fórmulas que faciliten a instalación de empresas no municipio e que se xere traballo. O candidato mostrou a súa preocupación ante o anuncio dos traballadores de Elnosa de desenvolver actos de protesta durante a campaña do Partido Popular. Afirma que el está preocupado por eles, pero reiterou que a situación da electroquímica é diferente á de Ence porque os seus propietarios xa mostraron a súa intención de abandonar Lourizán. Por este motivo, entende que "as cousas non se solucionan así" en referencia a posibles boicots dos actos de campaña.
Jacobo Moreira tamén promete a elaboración dun novo Plan Xeral de Ordenación Urbana e non rexeita reservar espazos para a creación de grandes áreas comerciais que estean promovidas por iniciativas particulares, aínda que mantén que o seu apoio se destinará a potenciar o comercio local.
O terceiro punto do seu programa céntrase na mobilidade, que se vería potencia coa creación de transporte público urbano e medidas que non supoñan perseguir o condutor. O líder popular afirmou que suprimirá o multamóbil dotando doutras funcións este vehículo adquirido polo actual goberno municipal.
Os populares queren potenciar tamén a Pontevedra social, educativa e cultural, ademais de reducir os impostos con redución do IBI rústico e urbano, ademais dunha rebaixa da viñeta.
Tamén queren potenciar o apartado de deportes e saúde porque, segundo Moreira, é necesario apoiar o deporte base e denuncia que numerosos equipos da cidade teñen que desprazarse a Ponte Caldelas e a Marín.
En materia sanitaria aposta pola creación do novo Hospital de Monte Carrasco. Ademais espera crear unha biblioteca municipal no edificio sindical, consensuar cos veciños o parque fluvial urbano, centralizar a oficina de Turismo nun único edificio, recuperar a zona monumental, sanear as parroquias do rural, potenciar o uso da bicicleta na cidade, humanizar as rúas e potenciar un goberno austero, transparente e participativo.
Os populares iniciarán a campaña coa pegada de carteis e o venres celebrarán unha cea mitin coa presenza de Alberto Núñez Feijóo e a ministra de Fomento, Ana Pastor, na finca Batacos. O presidente dos populares galegos tamén acudirá ao mitin principal da campaña en Pontevedra previsto para o mércores 20 de maio.
Relacionadas:
-
"Aquí hai dous candidatos. O señor Lores e eu. El avoga por pechar empresas e eu por mantelas e abrir máis"
Por Alejandro Espiño & Mónica Patxot |
-
Taxista, mariscador, panadeiro, adestrador... así son as 'profesións' de Jacobo Moreira
Por Redacción |
-
Jacobo Moreira aposta por converter o edificio sindical nunha biblioteca municipal
Por Redacción |
-
Destapar o río Gafos e crear un parque lineal, proposta do PP para o barrio de Campolongo
Por Alejandro Espiño |