O Bloque presentou os cabezas de lista das súas candidaturas para Bueu, Vilaboa e Marín
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
O portavoz nacional do BNG, Xavier Vence, destacou este xoves en Bueu que o Bloque se presenta ás vindeiras eleccións municipais cun obxectivo prioritario "converter os concellos en auténticas ferramentas de dinamización da sociedade e da economía".
Vence participou na presentación das persoas que encabezan as candidaturas de BNG-Asembleas Abertas na comarca do Morrazo. Trátase de Félix Juncal, que encabeza a lista en Bueu; Leticia Santos, en Moaña; Mercedes Giráldez, en Cangas; Ornela Fernández, cabeza de lista en Vilaboa; e Pilar Blanco, que encabeza a candidatura en Marín.
O portavoz nacional, así coma o candidato Félix Juncal, apelaron á importancia da cooperación entre concellos para lograr que sexan verdadeiros dinamizadores do pobo. Destacaron que é vital traballar conxuntamente para revitalizar o comercio de proximidade, para aproveitar os recursos naturais da zona ou para crear oportunidades entre as novas xeracións.
O candidato á reelección coma alcalde de Bueu, Félix Juncal insistiu na necesidade de revalorizar os recursos existentes na zona "para pivotar un novo crecemento económico", que permita fixar poboación na comarca e ofrecer opcións de calidade ás persoas, sobre todo aos máis novos, "esa vai ser a nosa gran aposta, a economía ao servizo da cidadanía".