Volve a Fragoso o Festixeve, que terá a Lontreira e Dakidarría como grandes atractivos
Por Redacción
O Campo de Vilar de Fragoso, en Santo André de Xeve, volverá ser o escenario dunha das principais apostas das Festas de Verán de Pontevedra. Volve o Festixeve, que chega á súa vixésimo sétima edición entre os días 1 e 4 de agosto.
Farao cunha programación chea de actuacións musicais, entre as que destacan os concertos que ofrecerán as bandas galegas Lontreira e Dakidarría o sábado 3 de agosto, a partir das 22:30 horas, na que será a xornada central deste novo Festixeve.
As actividades comezarán o xoves 1 de agosto coa apertura das barras e, ás 22:00 horas, cos xa habituais cantos de taberna, que nesta ocasión correrá a cargo de Son das Corbaceiras.
Ao día seguinte, xunto co inicio da oferta gastronómica do festival, que volverá ter prezos populares, organizarase un xogo de rastrexo inspirado na serie televisiva El juego del calamar. Será a partir das nove da noite. Poderán participar equipos de entre seis e dez xogadores e as prazas serán limitadas.
O sábado 3, xunto cos concertos de Lontreira e Dakidarría, haberá pulpeiro a partir das nove da noite e o broche musical á noite poderao un DJ ata o peche da xornada.
Como colofón, o domingo 4 de agosto, haberá inchables e xogos populares despois de comer, desde as catro da tarde, ou a tradicional procesión laica de empanadas e roscas.
Ademais, o público poderá gozar das actuacións musicais de Pulpiño de Viascón (18:00 horas), Chispas do Lérez (19:30 horas) e a Charanga OT (21:00 horas).
O Festixeve, entre outros servizos, ofrecerá zona de acampada libre e duchas, unha feira de artesanía e diversas demostracións.