Gas Natural Fenosa repoñerá a luz en Pasarón e argumenta que rompeu o contrato por "continuas demoras nos pagamentos"
Por Redacción
Gas Natural Fenosa decidiu tramitar a reposición da subministración eléctrica no estadio de fútbol de Pasarón tras cortalo na tarde do martes "ante o interese social desta infraestrutura para os pontevedreses", pero matiza que esa subministración será só temporal, pois a empresa tomou a decisión de romper o contrato co Pontevedra Club de Fútbol "polas continuas demoras nos pagamentos por parte do cliente".
A compañía emitiu un comunicado este mércores pola tarde, poucas horas despois da comparecencia pública do presidente granate, José Manuel Fernández, para dar a coñecer a súa postura neste asunto e explicou que o Pontevedra e Gas Natural Fenosa chegaron a un acordo para a firma dun contrato transitorio de tres meses ata que teñan novo provedor.
Este acordo adoptouse, segundo indican, co fin de buscar unha solución á situación actual do campo e a última hora deste mércores estase a tramitar a reposición da subministración.
Á marxe desta solución, Gas Natural Fenosa quere aclarar a súa versión do acontecido e asegura que a compañía "respectou con rigor os prazos e requisitos legais para este tipo de situacións, recollidos na normativa vixente".
Asi, mantén que "non houbo rescisión unilateral do contrato, pois se respectou ata o último momento", fronte ao declarado por José Manuel Fernández. Segundo indican, dende finais do mes de outubro informouse o Pontevedra que non habería renovación do contrato e que era necesario que buscase un novo provedor.
Ademais, aseguran que se informou da posibilidade do corte de subministración ao rematar o contrato e que no transcurso dos últimos meses houbo numerosas comunicacións nas que recordou a urxencia na contratación con outra compañía.
Ao respecto, o presidente granate indicou este mércores que xa se pechou a negociación con Iberdrola para que sexa o novo subministrador do servizo, pero aínda hai que formalizar o contrato.
Relacionadas:
-
José Manuel Fernández: "A la plantilla se le debe ahora el mes de febrero"
Por Diego Espiño |
-
Deputación e Concello tildan de "atropelo" e "comportamento impresentable" a actuación de Fenosa en Pasarón
Por Oskar Viéitez & Alejandro Espiño |
-
Gas Natural Fenosa corta a luz ao Pontevedra a pesar de estar ao corrente no pagamento
Por Diego Espiño |