Primeira vitoria para o Escola Xadrez Pontevedra na División de Honra
Por Redacción
A terceira xornada da Liga Galega de xadrez será recordada pola Escola Xadrez Pontevedra por lograr o seu primeiro triunfo na División de Honra.
O equipo do club que milita na máxima categoría autonómica, o EXP Ramón Escudeiro Tilve, impúxose ao Algalia de Santiago nun encontro celebrado na cidade de Lérez.
Daniel Rivera, Alberto Portela, Alexandre Belsley, David Fernández, Miguel Rodríguez e Manuel Lorenzo foron os encargados de materializar un triunfo moi valioso para as aspiracións da Escola Xadrez Pontevedra, que pasan por lograr a permanencia na categoría, xa que escapan momentaneamente dos postos de descenso.
O resultado final foi de 3,5 a 2,5 con vitorias parciais de Daniel, Miguel e Manuel, táboas de Alberto e derrotas de David e Alexandre.
XORNADA POSITIVA PARA O RESTO DE EQUIPOS
Dos oito equipos que compoñen a Escola Xadrez Pontevedra esta tempada, tan só o bloque da Terceira División encaixou unha derrota nos enfrontamentos do pasado fin de semana, mentres o resto lograron impoñerse nos seus respectivos choques.