Arosa e Barbadás empatan (3-3) nun partido vibrante e cheo de alternativas
Por Redacción
Repetiuse a historia da primeira volta. Arosa e Barbadás empataron de novo nun choque pleno de emoción e alternativas que puido gañar calquera. E como sucedese en terras ourensanas, de novo foron os arlequinados os que igualaron o marcador case no último suspiro, cun gol de Ramón, o primeiro do dianteiro arosista dende a súa chegada ao equipo, que esta vez converteu a habitual ruleta rusa dos minutos finais nunha bendición para os de Piscis.
Esta visto que o Arosa se aboa ás emocións fortes nos minutos finais de cada partido. Se hai unha semana lles escapaba a vitoria no desconto, nesta ocasión rescataron un punto no tempo engadido, cando tan só catro minutos antes se viran sorprendidos polo Barbadás, cun gol que facía presaxiar a vitoria visitante.
O partido foi un permanente toma e daca de ambos os dous conxuntos. O Arosa golpeou primeiro, a través dunha xogada entre Pablo Pillado, Nando e Xesús, que rematou Quique Cubas cunha excelente cabezada. Mesmo puido facer o segundo pouco despois, pero Eloy mandou fóra un pase de Quique Cubas.
Pero os ourensanos empataban por primeira vez tras un saque de esquina que Vieytes rematou de cabeza, poñéndose por diante sçolo tres minutos máis tarde, tras un roubo de Berto saíndo lonxe da súa portaría, que Martín aproveita para elevar por enriba do meta arosista.
Non se cumprira o primeiro minuto da reanudación cando o Arosa empataba, aproveitando un inoportuno esvarón de César que permite a Nando bater a Berto.
Co Barbadás mandando, ben dirixido por Moisés Pereiro, foi o Arosa quen tivo a máis clara ocasión para marcar, pero o remate de cabeza de Munín detívoo o meta visitante.
A falta de tres minutos, nun novo saque de esquina, o Barbadás volve adiantarse, ao aproveitar Cristian un rexeitamento na área local para bater a Vila.
Co tempo cumprido chegaba o gol de Ramón, nun remate de cabeza que celebrou con rabia e que significaba un empate que facía xustiza á fe de ambos os dous equipos, que non deron nunca o partido por perdido.
AROSA SC (3): Vila; Juanjo (José Ángel, min. 88), Martín, Alfonso (Munín, min. 66), Alex Freire; Rivas, Jesu (Ramón, min. 81); Nando, Pablo Pillado, Eloy; e Quique Cubas.
UDC BARBADÁS (3): Berto; Jorge, Vieytes, César, Alfredo; Nacho Currás, Nuno (Oli, min. 63); Martín Fernández (Cristian, min. 75), Moisés Pereiro, Rafita (Luis, min. 85); e Hugo.
Arbitro: García Villaverde (Ferrol). Amoestou a Alex Freire, Martín e Pablo Pillado, polo Arosa, e a Nacho Currás, Nuno, Vieytes e Oli, polos ourensanos.
Goles: (1-0) Minuto 9: Quique Cubas. (1-1) Minuto 17: Vieytes. (1-2) Minuto 21: Martín Fernández. (2-2) Minuto 46: Nando. (2-3) Minuto 87: Cristian. (3-3) Minuto 91: Ramón.
Incidencias: Campo Municipal da Lomba (Vilagarcía). Uns 700 espectadores. Gardouse un minuto de silencio en memoria do presidente do Somozas, Manuel Candocia.