Cinco probas deportivas traerán en 2014 a Pontevedra a máis de 3.000 piragüistas
Por Redacción
Máis de 3.000 padexeiros participarán nas cinco regatas de rango nacional e internacional que se celebrarán en Pontevedra ao longo deste ano. O calendario foi pechado este venres nunha xuntanza entre o concelleiro de Deportes, Agustín Fernández, e Esteban Alonso e Antonio Barreiro, director deportivo e responsable de actividades da Federación Galega de Piragüismo.
O ano comezará co Open de Kayak-Canoa Cidade de Pontevedra, que chegará ao Pontillón do Castro o 8 e 9 de marzo próximos. Seguirá coa Copa de España de 1.000 metros (26 e 27 de abril), a Copa de España de 500 e 200 metros (24 e 25 de maio), o Campionato de España de Novas Promesas (25 ao 27 de xullo) e, finalmente, a Copa de España de Maratón (2 e 3 de agosto).
Todas as probas serán no encoro de Verducido agás o maratón, que será no río Lérez como anticipo do Campionato de España do ano próximo e do Campionato de Europa de 2016.
Agustín Fernández subliñou que trátase dun calendario "realmente ambicioso" froito do entendemento coa Federación Galega e que vai supoñer un importante número de visitantes a Pontevedra, posto que algunha das probas (especialmente a de Novas Promesas) implica desprazamento de moitos pais e adestradores.
Por outra banda, destacou a categoría deportiva do calendario, remarcando que a Copa de España de Maratón será o único Selectivo clasificatorio directo para o Mundial de Oklahoma deste ano.
Na xuntanza quedou completamente pechado o Open Kayak-Canoa Cidade de Pontevedra. Trátase da terceira edición deste Open patrocinado directamente polo fabricante portugués Nelo. As dúas primeiras edicións celebráronse en Portugal e, desta volta, recala en Pontevedra. Agárdase a presenza de máis de 600 padexeiros de 20 países. Entre eles hai varios medallistas nos pasados Xogos Olímpicos e tamén campións no último mundial de Duisburgo.
Agustín Fernández acordou coa Federación que tamén se invite a David Cal e ao deportista húngaro Attila Vajda, xestións que, de dar froito, garantirían un duelo realmente espectacular.
As dúas partes pretenden que sexa un evento do máximo rango e barállase a instalación de carpas no entorno do encoro para acoller á representación dos diferentes países, así como un servizo de autobuses entre Pontevedra e Verducido.
Relacionadas:
-
Padexeiros de dez países cítanse no Pontillón do Castro na Nelo Winter Challenge
Por Redacción |
-
Máis de mil padexeiros competirán no Pontillón nas vindeiras dúas fins de semana
Por Redacción |
-
12 probas deportivas de rango nacional e internacional terán a súa sede en Pontevedra en 2014
Por Diego Espiño |
-
300 padexeiros de varias categorías participaron na regata amigable disputada en augas do río Lérez
Por Redacción |