Fin da aventura australiana de Lourdes Domínguez: cae na primeira rolda de dobres por 6-3 e 6-2
Por Redacción
Non foi o mellor Aberto de Australia para Lourdes Domínguez. Tras caer en primeira rolda do cadro de individuais ante a danesa Caroline Wozniacki e soportar temperaturas de ata 44 grados, o que obrigou a atrasar a súa participación en dobres, a tenista pontevedresa despediuse este venres do primeiro Grand Slam da tempada. Tampouco puido superar o primeiro partido no torneo por parellas.
Certo é que o sorteo non lle favoreceu. Se en individuais o seu rival era unha ex número 1 do mundo, en dobres debutaba ante as cabezas de serie número 3, a parella rusa formada por Ekaterina Makarova e Elena Vesnin. E tanto ela como a súa compañeira, a estadounidense Lauren Davis, apenas tiveron opción. Caeron en dous sets por 6-3 e 6-2 en tan só 59 minutos de partido.
Tras uns días de descanso, Lourdes Domínguez regresará á competición. Farao nos torneos que, nas próximas semanas, iranse sucedendo no continente americano.