Mala imaxe do Teucro que empata en Lavadores tras unha lamentable segunda parte (31-31)
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Sen ambición nin intensidade é pouco menos que imposible gañar un partido. O Teucro saltou á pista do vicecolista Lavadores a cumprir un trámite molesto, sen nada en xogo para os azuis, e practicamente "regalou" a posibilidade do triunfo a un equipo local que apenas fixo outra cousa que aproveitar os erros do seu adversario para arrincar un empate que, en condicións normais, nin soñasen.
Cunha primeira parte aceptable e unha segunda para esquecer, o equipo azul foi unha caricatura, carente de ideas nin sistema, limitado ás accións ou a inspiración individual dos seus xogadores.
Os teucristas foron case sempre por diante no marcador nuns primeiros 30 minutos, que xa anticiparon a "feira" do que viría a continuación en canto a falta de rigor defensivo por parte de ambos os contendentes, especialmente os visitantes. O descanso coincidiu coa maior vantaxe visitante do partido (15-19).
Ata aí chegou a superioridade teucrista. Lavadores empezou a limar diferenzas, logrando empatar por primeira vez (21-21) no minuto 37 de partido. A partir de aí, aínda o Teucro logrou recuperar a iniciativa e retomar unha vantaxe de dous goles, pero os locais xa viran que podían levar o partido e superado o ecuador do período final lograban poñerse arriba (24-23).
As vantaxes do Lavadores oscilaban entre 1 e 2 goles, fronte a un Teucro impotente, pasivo, sen recursos nin ideas. A falta de 4 minutos para o final, con 31-29 no luminoso, Lavadores puido sentenciar, pero a finalización desde o extremo acabou no traveseiro e o Teucro, agora si, tivo un xesto de orgullo, logrando en inferioridade un parcial de 0-2 para empatar o partido e aguantar un último ataque local, con ata dúas accións de lanzamento máis unha terceira co reloxo a cero, que puido supoñer para Lavadores levar unha vitoria que, por deméritos teucristas, tivo moi preto (31-31).
Consulta as estatísticas nesta ligazón