Rompendo moldes na Lama: unha futbolista de 27 anos, primeira e única muller no Torneo Intercentros Penitenciarios
Por Natalia Puga
Unha moza de 27 anos interna no centro penal da Lama marcou este martes un fito na historia dos centros penitenciarios galegos. Foi a primeira e única muller en participar na fase autonómica do Torneo Intercentros Penitenciarios Copa RFEF 2023.
O torneo citou este martes no campo de fútbol Manuel Anxo Cortizo de Lalín aos equipos da cinco cárceres galegas e, entre todos os participantes, foi a única xogadora muller. Ademais, ata o de agora, nas dez edicións anteriores da competición en Galicia, nunca participara unha muller.
A moza, natural de Venezuela, xa xogaba ao fútbol no seu país e, agora que está na prisión da Lama, seguiu coa súa afección.
Os 15 internos e unha interna convocados polo centro da Lama para esta cita co fútbol e a reinserción lograron gañar o campionato e o equipo foi seleccionado para participar na fase nacional do torneo, que se disputará nos campos madrileños de Cotorruelo o próximo 30 de maio. Aí xogarase estar na Fase Final 2023.
Eran cinco equipos para unha praza: A Lama, Teixeiro, Pereiro de Aguiar, Bonxe e Monterroso. Os cinco enfrontáronse entre si a unha única volta e, finalmente, gañou A Lama, converténdose no representante galego na segunda fase nacional do Torneo Intercentros Penitenciarios Copa RFEF 2023, que este ano celebra a súa undécima edición tras o parón motivado pola pandemia.
A vitoria logrouse tras un partido moi rifado co centro de Teixeiro. Os dous equipos enfrontáronse no último partido empatados a 9 puntos e con todo por decidir. Un empate, tendo en cuenta a diferenza de goles, valíalle á Lama para ser o campión galego, polo que toda a presión era para o conxunto de Teixeiro. A pesar de todo, A Lama fixo valer a súa pegada e impúxose na cita decisiva a Teixeiro.
En Lalín, e con este torneo, o fútbol converteuse no medio reinserción para as persoas privadas de liberdade, pois esta cita co fútbol ten como obxectivo "a formación integral das persoas privadas de liberdade podendo conseguir a través del os obxectivos de reeducación e reinserción social".
Este torneo é resultado dun convenio asinado entre a Real Federación Española de Fútbol (RFEF) e Institucións Penitenciarias desde o ano 2007, un programa pioneiro que conseguiu o apoio e a felicitación por parte de UEFA, converténdose en referente, ademais, do traballo en materia de responsabilidade social que se desenvolve con gran éxito no noso país.
O proxecto desenvólvese na actualidade nuns 40 centros penais, cunha poboación estimada duns 38.000 internos. En Galicia, a Real Federación Galega de Fútbol ten en marcha o programa nos cinco centro con actividades como a creación de escolas deportivas de fútbol, competicións internas de fútbol nos centros, cursos de formación en fútbol e fútbol sala e cursos de iniciación á arbitraxe e entrega de material deportivo.
A Real Federación Galega de Fútbol, xa desde a próxima semana, poñerá en marcha unha escola de fútbol permanente en cada un dos centros penitenciarios de Galicia. Haberá adestramentos semanais durante todo o ano.
Á entrega de premios asistiron o presidente da RFGF, Rafael Louzán; o vicepresidente da RFGF, Fernando Iglesias; o alcalde de Lalín, Pepe Crespo; e o concelleiro de Deportes, Avelino Souto.
Relacionadas:
-
Os 25 anos da prisión da Lama, "unha historia de seres humanos" que a converteron en referente
Por Natalia Puga & Mónica Patxot |
-
O equipo da Lama, campión do XI Torneo Intercentros Penitenciarios – Copa RFEF 2023
Por Redacción |
-
Recoñecemento a nivel europeo para A Lama polo programa radiofónico 'Ellas improvisan'
Por Natalia Puga |