Convivencia galaico-irlandesa no rugby pontevedrés
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
![](/web/cache/scene/uploads/fotos/foto/c38/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/6450f5ea11-dsc_0244.jpg)
© Mareantes RCP
![](/web/cache/scene/uploads/fotos/foto/b86/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/6450f61884-dsc_0717.jpg)
© Mareantes RCP
Unha das moitas tradicións que converten ao rugby nun deporte especial son as xiras que protagonizan moitos equipos unha vez finalizan a súa tempada, independentemente da categoría na que militan.
Compartir xornadas de adestramento, algún que outro partido e intercambiar experiencias son obxectivos deste tipo de xornadas, como a que se viviu a pasada fin de semana en Pontevedra.
Un dos equipos da cidade, o Mareantes Rugby Club, recibiu a visita do Greystones RFC irlandés, cuxo primeiro equipo disputa a liga semiprofesional de 2ª División no seu país.
Unha expedición de ata 45 persoas entre plantel, corpo técnico e directivos compartiron xornadas en terras pontevedresas, disputando un bonito encontro no que o Mareantes contou con xogadores convidados do Pontevedra Rugby Club e tamén dos equipos de Ourense, Santiago e Lalín.
O resultado, aínda que case era o de menos, foi un axustado 33-36 para o Greystones. Pouco importaba dentro dun ambiente de convivencia que incluíu actividades turísticas e culturais e que finalizou co tradicional terceiro tempo no que as dúas entidades deportivas intercambiaron agasallos.
O Mareantes promete ademais devolver a visita a terras irlandesas nun futuro non moi afastado.