A xogadora senegalesa Maimouna Diarra reforza ao Arxil ata final de tempada
Por Redacción
O Club Baloncesto Arxil anunciou de xeito oficial a fichaxe da xogadora senegalesa Maimouna Diarra, procedente do ASCVD de Dakar.
Diarra chega ao club verde para cubrir a baixa da pivot xamaicana Tajay Ashmeade, que se desvinculou das verdes para xogar na máxima categoría.
A nova xogadora, nacida en 1991, chegará a Pontevedra previsiblemente o día dous de xaneiro e espérase que poida debutar no dobre amigable programado para os días 4 e 5 de xaneiro anye o Olivais portugués.
Dende a dirección técnica verde confían en que Maimouna Diarra, que recentemente disputou o campionato africano coa súa selección, destaque nos labores defensivos e axude ao equipo lerezano a manter o nivel de xogo mostrado no último mes de liga.
A competición para o Arxil na Liga Feminina 2 non se retomará ata o día 11 de xaneiro, cando visitará a pista do Cortegada de Vilagarcía.