Intensidade e concentración defensiva, armas do Poio FS para derrotar (5-3) ao Universidad de Alicante
Por Ramiro Espiño
Partidazo del Poio FS fronte a un rival dos máis perigosos da liga. As rapazas de Marcio Santos non deron opción ao Universidade de Alicante, asinando unha das actuacións máis completas do que levamos de tempada.
Intensidade defensiva, concentración máxima en todas as accións e escasas rotacións, foron as armas que utilizou o técnico local para lograr unha merecida e brillante vitoria, que tivo ademais a súa orixe no gran labor de equipo realizado polas "rojillas".
Cunha Silvia sobria e segura baixo paus, e unha Ceci que deixou de lado o individualismo do que peca nalgunhas ocasións para poñer o seu indubidable talento ao servizo do colectivo, Claudia e Charo non deixaban de achegar, a primeira calidade, a segunda entrega.
Pero sobre todas volveu a brillar o labor de Kiko, que realizou un partido maiúsculo, multiplicándose en defensa e ataque, e logrando un gol, o segundo do equipo local, para enmarcar, tras desbordar o seu par cun "cano" espectacular.
Marcio apostou polo seu cinco de gala, e as xogadoras non o defraudaron. Con mínimos respiros no banco, a achega de Paloma, Peke e Elena foi tamén brillante, especialmente nos labores defensivos, conseguindo non baixar o ton en ningún momento. Pero é que as catro xogadoras titulares de campo estiveron brillantes, ata o punto de que todas elas lograron facer gol.
O Poio rozou a perfección defensiva e pronto abría a conta por medio de Claudia, tras aproveitar unha gran xogada de Ceci, que lle serviu o tanto en bandexa. Logo viría o golazo de Kiko que puxo de pé á bancada. E aínda puideron ser máis, pois Elena e Claudia tiveron nas súas botas claras ocasións.
Mentres as alacantinas movían ben o balón, pero se estrelaban coa firme defensa local, ou en última instancia cunha Silvia segura e seria, que ademais se permitía iniciar cos seus saques en longo máis dunha xogada de ataque con moito perigo.
Charo, dunha excelente volea tras un saque de banda facía o terceiro, nada máis comezar a segunda parte, e Ceci, cun tiro afastado sentenciaba o partido, cando quedaban aínda máis de 12 minutos por xogar.
Co contundente 4-0 no marcador, o técnico alicantino ordenou o xogo de cinco, que lle deu resultado na primeira xogada, conseguindo reducir diferenzas por medio de Amelia.
Tras a lixeira sorpresa, o Poio volveu axustar a defensa e xa non pasou apuros ata un minuto final de verdadeira loucura, con gol de Sara, sen tempo para inquietar, porque Ceci marcaba de novo tras un roubo de Claudia, e Sara pechaba a conta, case co reloxo a cero.
POIO F.S. (5): Silvia; Charo, Claudia, Ceci, Kiko -cinco inicial-, Peke, Elena e Paloma. Non xogaron: Carmen (p.s.), Mar, Yoly, Tania e Anita.
UNIVERSIDADE DE ALICANTE (3): Toñi; Andrea Soriano, Andrea Castelló, Fátima, Sara -cinco inicial-, Amelia, Txitxo, Noe e Pao. Non xogou: Ana Belén (p.s.)
Árbitros: Lago Barreiro e Álvaro García (Colexio Galego-Vigo). Amoestaron a Paloma, no Poio, e a Sara, Fátima e Andrea Soriano, polo equipo alicantino.
Goles: (1-0) Minuto 4: Claudia. (2-0) Minuto 8: Kiko. (3-0) Minuto 22: Charo.(4-0) Minuto 28: Ceci. (4-1) Minuto 34: Amelia.(4-2) Minuto 39: Sara. (5-2) Minuto 40: Ceci. (5-3) Minuto 40: Sara.
Incidencias: Pavillón Municipal da Seca (Poio). Case cheo.