O brasileiro Roney Franzini, solución para a portería do Cisne ata final de tempada
![Diego](/web/cache/scene/uploads/xornalistas/foto/5df/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/570532d2ea-20160329-patxot-diego-espino-1009.jpg)
Por Diego Espiño
O Club Cisne atopou recambio para Jorge Villamarín, recentemente operado do seu xeonllo e que se perderá o que resta de tempada.
Desde a ausencia por lesión do gardameta os resultados do equipo pontevedrés resentíronse, polo que a directiva decidiu finalmente realizar un esforzo co obxectivo de incrementar as opcións de pelexar polo ascenso á máxima categoría.
O elixido para cubrir o oco de Villamarín é o brasileiro Roney Bengivenga Franzini, que aterra no Municipal de Pontevedra en calidade de cedido ata o final do curso polo BM Benidorm da Liga Asobal.
A noticia foi confirmada inicialmente polo club alacantino, tras poñer facilidades para a súa saída.
Roney Franzini podería debutar xa este mesmo sábado (18.00 horas) co Cisne no encontro que lles enfrontará a domicilio ao Trops Málaga.