O Campionato Galego de Campo a Través Adaptado regresa á Illa das Esculturas
A Illa das Esculturas acollerá de novo o Campionato Galego de Campo a Través Adaptado para persoas con discapacidade intelectual este mércores 23 de febreiro. Este espazo é ideal para a realización de calquera actividade deportiva, incluídos acontecementos de alto nivel como os Campionatos de España de Ciclocross, segundo destacou Tino Fernández, o concelleiro de Deportes, no acto de presentación do evento.
Ademais, mostrou a súa emoción porque todas as persoas teñan a posibilidade de facer deporte. "Nesta cidade na que queremos ser o máis inclusivos que poidamos, é motivo de orgullo" engadiu.
Os concursantes organízanse por nivel de discapacidade en tres seccións: competición, na que recorren 3.200 metros de distancia; adaptación, con 2.100 metros na categoría masculina e 1.500 na feminina; e xogo, con 600 metros. As probas comezan ás 10:00 horas da mañá cun traxecto previo para o recoñecemento dos circuítos e finalízanse coa entrega de galardóns ás 13:00 horas.
A última edición celebrárase no 2019, antes do confinamento. Susana García Senra, secretaria da Federación Galega de Deporte Adaptado, enfatizou o esforzo que implica retomar a actividade e as consecuencias que deixou a pandemia. Os efectos nótanse no número de participantes, xa que no 2019 eran máis de douscentos e no 2022 pasan a ser 102, reducíndose á metade.
No campionato deste ano intervirán deportistas de doce clubs galegos, dos cales oito pertencen á provincia de Pontevedra e os catro restantes á Coruña.
Susana García concluíu remarcando a importancia que outorgan dentro da Federación á existencia de contornas, clubs, entrenadores e medios para o deporte adaptado.