Sólido triunfo do Pontevedra no Carballiño (1-5) para colocarse a tiro de pedra do líder
Por Diego Espiño
Á terceira foi a vencida e o liderado está por fin a tiro de pedra para o Pontevedra Club de Fútbol, que tras dúas xornadas con derrota sen aproveitar os tropezos do Unión Adarve esta vez si fixo os deberes vencendo de maneira contundente ao Arenteiro no estadio do Espiñedo, no Carballiño, e colócase a tres puntos do primeiro posto.
Os granates saltaron ao céspede sabendo que o seu principal rival perdera, pero non se deixaron levar pola ansiedade e centráronse en recuperar o nivel perdido as dúas últimas semanas. Para iso Ángel Rodríguez, que recuperaba efectivos, apostaba por volver ao once inicial que tan ben lle funcionaba durante a xeira gañadora do seu equipo. Iso supoñía apostar por Brais como acompañante de Charles na dianteira e deixar a Rufo no banco de suplentes.
Pola súa banda os locais chegaban á cita no seu mellor momento da tempada e reforzados no mercado de inverno, plantexando un partido á expectativa dando a iniciativa ao Pontevedra e repregando coas liñas moi xuntas para afogar os espazos do seu rival. Ante iso o balón era pontevedrés, aínda que nos intantes iniciais con dificultade para profundar.
Álex González foi o primeiro en probalo cun duro disparo afastado que saíu centrado ás mans do porteiro, aínda que as ocasións non abundaban. Tamén o tentou Joseca para o Arenteiro nunha das poucas chegadas ourensás, cun centro-chute ao que respondeu seguro Cacharrón.
Foi así ata superado o ecuador do primeiro acto, cando nunha rápida acción chegou o 0-1 dos granates para recuperar a súa pegada perdida. Seoane sacaba de banda sen perder un segundo cara á a área collendo descolocada á defensa local, Brais cazaba o coiro e vía a chegada en carreira pola esquerda dun Álex González que fusilaba cun disparo raso e cruzado ao primeiro toque ante o que nada podía facer o gardameta Diego.
Xa temos movemento no Espiñedo!
— En Xogo tvG2 (@EnXogo_tvG2) February 20, 2022
@CD_Arenteiro
@PontevedraCFSAD (Álex, 25')
Adiántanse os de Ángel Rodríguez grazas ao gol do seu capitán @Alexgm07 a pase de @BraisAbelenda
Moita presenza de seareiros granates nas bancadas
Na G2 ou en https://t.co/pE2Xnwpb1R pic.twitter.com/8hOaVYt8Ln
O gol fixo saltar polo aire a formulación dos do Carballiño, e de súpeto o Pontevedra empezou a atopar espazos e accións vantaxosas en ataque, desaproveitando Rubio en dúas ocasións consecutivas a oportunidade de facer o segundo.
Obrigado a reaccionar o Arenteiro adiantou liñas e atopou réplica primeiro cun disparo afastado de Adrián Cruz e despois nun centro de Pibe desde o costado zurdo para un Uxío da Pena que ao bordo da área pequena conectaba un testarazo que se ía lixeiramente alto. Empezaba a asomar o equipo local, pero co que non contaban os de Fran Justo era con quedar en inferioridade antes do descanso, nunha entrada de Adrián Cruz a Álex González, pisando ao capitán granate no xemelgo na súa caída, que o colexiado non dubidou en sancionar coa vermella directa.
Aínda por riba castigo xusto antes do paso por vestiarios chegaría o 0-2, nun córner lanzado por Yelko despexado pola defensa en primeiro instancia pero atopando un disparo no rexeite de Miguel Román que Diego Seoane, cunha bonita manobra, desviou de taco despistando ao porteiro e introducindo o balón no fondo da portería.
Tempo de lecer no Espiñedo!
— En Xogo tvG2 (@EnXogo_tvG2) February 20, 2022
@CD_Arenteiro
@PontevedraCFSAD (@Alexgm07 25' e Seoane 44')
Moito rebumbio antes do descanso:
Ocasión clara de @UxiodaPena
Cartón vermello directo a @cruz_adri10cj
Golazo co calcaño de Seoane
Sigue a segunda parte na G2! pic.twitter.com/KCvPX7yjwE
O encontro estaba encarrilado e a remontada local parecía case unha quimera, máis se cabe cando aos 48 minutos o dianteiro Uxío da Pena, nun mal apoio, lesionábase de gravidade. Todo lle saía ao revés ao Arenteiro. A pesar diso, con orgullo, seguiron pelexando ante un Pontevedra que baixou a súa intensidade e comezou a permitir achegamentos como o de Renan Zanelli no minuto 54 cazando un envío en longo, controlando e disparando cruzado con boa resposta de Cacharrón.
Co superioridade numérica, curiosamente, os de Ángel Rodríguez perderon o dominio do coiro, claro que os minutos xogaban ao seu favor e o final estaba cada vez máis preto sen que se producisen cambios no marcador para goce da numerosa afección visitante presente no Espiñedo.
Chegouse dese xeito ao minuto 70, cando se deu por pechado o partido de novo nunha acción disciplinaria. Cacharrón xogaba en longo e o seu pelotazo gañábao en velocidade Alberto Rubio á defensa derrubándoo Pol Bueso cando encaraba a meta rival. De novo vermella directa para deixar ao seu equipo con nove homes sobre o céspede. Pero non quedou aí o asunto por en o lanzamento da falta directa, desde a frontal, o propio Rubio salvaba a barreira no seu lanzamento e anotaba 0-3 cunha bonita execución.
O único lunar granate da tarde chegaría só dous minutos despois, e é que aínda con dous homes máis sobre o verde vía como Sobrido adiantábase a Rufo nun córner batendo cun remate de cabeza a Cacharrón. Unha semana máis encaixando, e van nove partidos seguidos. Tras iso Anxo Rodríguez comezou a repatir minutos e dar descanso a algún dos seus homes. Todo estaba decidido para un Pontevedra que se deu o gusto de marcar o cuarto por medio de Rufo no 87 e o quinto de Seoane xa no 94 e que se relanza na súa obsesión de conseguir o ascenso directo.
Final no Espiñedo!
— En Xogo tvG2 (@EnXogo_tvG2) February 20, 2022
@CD_Arenteiro (@Sobrado09 76')
@PontevedraCFSAD (@Alexgm07 25', Seoane 45'- 95', @a10_rubio 73', @rufinho9 88')
Un partido condicionado polas lesións e expulsións
O @PontevedraCFSAD pasa a depender de si mesmo no tirapuxa co @UnionAdarve (a 3 puntos) pic.twitter.com/KCG6Bb9k5V
CD ARENTEIRO (1): Diego (Iago, min.48), Ger, Pol Bueso, Pibe (Cassio, min.73), Álex Fernández (Portela, min.73), Renan, Adrián Cruz, Raúl (Sobrido, min.48), Joseca, Eimil, Uxío da Pena (Markitos, min.48).
PONTEVEDRA CF (5): Cacharrón, Seoane, David Soto, Churre (Samu Santos, min.77), Samu Araújo (Oier Calvillo, min80), Miguel Román (Javi Rey, min.77), Yelko Pino (Romay, min.77), Álex González, Rubio, Brais Abelenda, Charles (Rufo, min.56).
Árbitro: Francisco García Riego, auxiliado nas bandas por Mier Rodríguez e Quirós Pérez (Asturias). Amoestou a Renan e Joseca no Arenteiro e a Charles e Seoane no Pontevedra. Expulsou no equipo local a Adrián Cruz (min.40) e a Pol Bueso (min.70) por vermella directa, y tamén ao delegado de campo Chechu.
Goles: 0-1 Álex González (min.24); 0-2 Seoane (min.44), 0-3 Rubio (min.72); 1-3 Sobrido (min.75); 1-4 Rufo (min.87); 1-5 Seoane (min.94).
Incidencias: Partido da xornada 22 de liga no Grupo I da Segunda RFEF disputado no Estadio Municipal Espiñedo do Carballiño, cunha importante presenza de afeccionados del Pontevedra.