Tres partidos en oito días poñen a proba ao novo Pontevedra
Por Diego Espiño
O Pontevedra de Manu Fernández prepárase para a súa semana máis esixente con tres citas claves que marcarán as posibilidades reais dos granates en liga.
En só oito días o equipo lerezano recibirá en Pasarón ao Alondras (domingo 27 ás 17:00 horas), visitará ao Rápido de Bouzas (xoves 31 ás 20:30 horas) e xogará de novo na casa ante o Deportivo B (domingo 3 ás 17:00 horas).
Nove puntos vitais que poden erguer o Pontevedra aos primeiros postos confirmando unha reacción tras o cambio no banco ou pola contra complicar moito o seu futuro próximo.
O peor de todo para o técnico granate son os problemas de efectivos cos que chega a esta tripla cita, con apenas 15 futbolistas do primeiro plantel dispoñibles.
Por ese motivo Manu Fernández non quere forzar a reaparición este domingo dos xogadores que mellor evolucionan das súas molestias, como Fran Fandiño e Caco, e garantir a súa presenza no resto de compromisos ligueiros.
Caso diferente é o de Benja, co que se ten precaución pero que está plenamente reincorporado ao grupo.
Para completar a convocatoria do choque ante o Alondras, Fernández deberá botar man, por segunda semana consecutiva, dalgún xogador do filial.