O Medio Maratón segue crecendo e espera a presenza de máis de 1.500 corredores
Por Diego Espiño
"Estamos ante la mejor medio maratón de las que se organizan en Galicia". Así de contundente se mostrou Juan Romero, vicepresidente da Sociedad Gimnástica, na presentación da XVIII edición do Medio Maratón Pontevedra Serviocio, última proba do recén estreado Circuito de Carreiras Populares de Pontevedra.
Un ano máis a inscrición bateu récords e a organización espera que o próximo domingo, día 20 de outubro, máis de 1.500 atletas se dean cita na saída, fixada para as 11:00 horas no Centro Galego de Tecnificación Deportiva.
O circuíto deseñado para a ocasión será o mesmo da pasada edición, con dúas voltas polas rúas do centro da cidade para completar os 21.097 metros oficiais da carreira.
A proba, segundo destacou Romero, mantén o seu carácter popular cun "90% de gente del entorno, queremos que corra sobre todo gente de Pontevedra y de Galicia".
Entre os inscritos destacan os gañadores de 2012, Manuel Hurtado e Águeda Blanco, e ateltas como Iván Docampo, Víctor Riobó, Elias Domínguez, José Antonio Ramallo, Robertas Geralavicius, Laura García, Eva María Iglesias ou Leticia Fernández.
Entre os servizos que ofrece a organización, por segundo ano contará con corredores guía que marcarán diferentes ritmos en función das necesidades de cada participante. Así, os guías correrán cada quilómetro a 4 minutos, 4'15 '', 4'30 '', 4'45 '', 5' e 5'30 ''.
Ademais como novidade dende a Gimnástica anima os participantes que o desexen a sumarse aos dous adestramentos previos á carreira, un que se realizará este martes dende as 20:00 horas na Illa das Esculturas, e outro o próximo xoves, tamén ás 20:00 horas e con axuda da Policía Local, para realizar unha inspección do circuíto dende o Centro Galego de Tecnificación.
CONCURSO FOTOGRÁFICO
Como complemento á celebración do XVIII Medio Maratón Pontevedra Serviocio habilitouse un concurso fotográfico cun premio de 100 euros en material de fotografía para a persoa gañadora.
Cada participante poderá enviar un máximo de dúas fotografías dixitais, en formato JPG, ao correo electrónico cfmmp@pontevedra.eu antes do 31 de outubro.