Manu Fernández faise cargo do Pontevedra ata que chegue o novo adestrador
Por Diego Espiño
Milo Abelleira será o encargado de buscar o novo adestrador do Pontevedra Club de Fútbol despois da saída de Nando.
Así o decidiu o Consello de Administración nunha reunión de traballo á que asistiron José Antonio Millán, Luis Durán, Lupe Murillo e José Manuel Fernández, ademais do propio director deportivo.
De momento, e de xeito interino, será o ata agora segundo adestrador e técnico do filial, Manu Fernández, o que se fará cargo do equipo, empezando pola sesión preparatoria fixada para a tarde do mércores e na que Nando ten previsto despedirse do plantel.
Segundo trasladou o presidente do club, José Manuel Fernández, os obxectivos que fixarán ao futuro preparador son os mesmos que ata agora, "xogar a fase de ascenso e ascender de categoría".
José Manuel Fernández: "Os xogadores aducen que non tiñan estilo, que non sabían a que xogaban,"
A preferencia dos directivos granates é que o adestrador sexa da zona e principalmente "que sexa unha persoa que conecte coa bancada, que deseñe un estilo de xogo que faga que os afeccionados se sentan próximos aos xogadores," sinalou Fernández.
O presidente recoñeceu que ás oficinas do club chegaron xa "máis de 20 propostas de adestradores", pero a teor das súas palabras non tomarán unha decisión precipitada ao respecto: "quixemos darlle a pausa de polo menos 48 horas, que se normalice o traballo ata o domingo,".
En relación ao acontecido entre Nando e os seus xogadores e as declaracións do técnico valenciano na súa despedida, recoñecendo sentirse molesto por non contar coa confianza dos futbolistas, o representante do Consello defendeu o "exercicio de responsabilidade do plantel", ademais de trasladar as queixas que estes tiñan do acontecido no comezo de liga: "os xogadores aducen que non tiñan estilo, que non sabían a que xogaban, ese era un feito grave".
Relacionadas:
-
Manu Fernández é o elixido e seguirá ata final de tempada
Por Diego Espiño |
-
Total secretismo no Pontevedra ante a contratación do novo adestrador
Por Diego Espiño |
-
Nando despídese do plantel mentres o club busca novo adestrador
Por Diego Espiño |
-
Nando abandona o Pontevedra CF porque "los jugadores no confiaban en el cuerpo técnico"
Por Diego Espiño |
-
Nando pensa a súa continuidade tras a chamada á orde do presidente do Pontevedra
Por Ramiro Espiño |