600 socios, obxectivo da campaña de aboados do Poio FS
Por Diego Espiño
A celebración do Torneo Concello de Poio de Fútbol Sala servirá de festa de inicio de tempada para o conxunto vermello e a súa afección.
Ademais dos partidos entre o equipo masculino e o feminino do Poio ante o Vermuin portugués (ás 17:00 ás 19:00 horas respectivamente) e do filial feminino ante o Barranha (20:30 horas), a xornada contará cunha serie de actividades nas inmediacións do pavillón.
Dende as 16:00 horas o club instalará inchables, organizará xogos de habilidade co balón ou partidos nun fútbolín humano. Todo iso para animar os afeccionados nun dos principais retos da tempada, incrementar a súa xa nutrida masa social.
O Poio Fútbol Sala ten deicido poñer en marcha unha campaña de aboados cun obxectivo claro, chegar aos 600 socios, segundo recoñeceu o presidente do club Juanjo García.
Por 20 euros, que será o prezo do carné, os afeccionados poderán asistir a todos os partidos dos 16 equipos da entidade, incluíndo o Poio Pescamar que militará por primeira vez na máxima categoría do fútbol sala feminino nacional.
Un dos principais motivos para promover a campaña é o problema de espazo que pode xerarse no Pavillón da Seca durante a tempada: "los socios no van a tener un sitio fijo pero van a tener su entrada asegurada. El pabellón a veces se nos queda pequeño, tenemos una afición que es muy fiel y hay que cuidarla".
O Poio Fútbol Sala quixo agradecer o apoio recibido para a organización do torneo e a posta en marcha da campaña de socios por parte do Concello, a pena Os Miñocas e a Deputación.